Pamahaw uban ang mga Santos

Sa halawom nga gabii wala ko duawa sa duka busa nagbasa basa na lang ko og Bibliya.

Akong gibasa kadtong ebanghelyo ni Lukas diin si Maria niduaw sa iyang ig-agaw nga si Santa Isabel. Ato kining mabasa sa Lukas 1;39-56.

Managsama silang nagmalipayon sa maong panagtagbo. Managsama silang niambit sa maayong balita.  Nisantop hinuon sa akong hunahuna kun unsa kaha nga moduaw matag classroom sa matag tunghaan uban ang mga piniling mga layko aron mohimo og storytelling cum breakfast sa maong mga bata.

Himoong sukaranan sa pagsaysay ang kinabuhi sa mga santos aron ang mga kabataan masayud ug madasig sa ilang kinabuhi.

Human sa hamubong sugilanon, adunay pag-ampo ug pagbendisyon sa mga kabataan dayon yano apan himsog nga pamahaw alang sa atong mga kabataan.

Nunot usab niini sila o ang ilang section dasigon nga mosimba kuyog sa ilang mga ginikanan sa sunod Dominggo atol sa Children’s Mass sa matag alas kwatro ang takna sa hapon (4:00pm) diin sila usab ang mamahimong pilgrims sa maong santos nga misa.

Ang mahinungdanon mao nga mao nga himoon ang igong pagpangandam ingon man ang information drive ngadto sa mga tunghaan aron sa ingon mamahimong dunay kalambigitan ang tanang sektor sa parokya.

Kun kanus-a kini mahitabo, agad lang kita sa Dios ug sa panahon nga iyang gilatid apan sa pagkakaron buhaton ang pagpangandam ingon man ang pag-ampo. Amen!