Impeachment batok ni Sara

Magkinahanglan og 106 ka kongresista nga mosuporta aron ang Articles of Impeachment batok kang Vice President Sara Duterte matugyan sa Senado aron ang mga Senador maoy magsilbi nga huwes sa Impeachment trial.

Ang 20th Congress dunay 317 ka mga kongresista, ang 254 niini nagrepresentar og mga distrito sa lainlaing dapit sa nasud, ug ang laing 63 ka kongresista nagrepresentar og lainlaing Partylist Group.

Gilatid sa balaod nga ang usa ka Impeachment Complaint maduso lang sa Senado kon suportahan kini og 1/3 sa kinatibuk-ang gidaghanon sa mga kongresista.

Dako ang posibilidad nga daghang kongresista ang mosuporta aron ang Articles of Impeachment ikaduso didto sa Senado, apan didto sa Senado mora’g dili sigurado nga makuha ang 2/3 votes aron makonbikto si Vice President Duterte sa impeachment.

Ang mga senador nga gihulagway nga alyado sa mga Duterte mao sila Senador Bong Go, Rubin Padilla, Rodante Marcoleta, Imee Marcos, Pia Cayetano, Camille Villar, Jinggoy Estrada, Chiz Escudero, ug si Ronald “Bato” Dela Rosa.

Kon kining mao nga mga senador mobotar aron i-dismiss ang impeachment case batok sa vice president, dili makonbikto si Duterte, apan ang problema kay si Senador Dela Rosa nagtagotago man ug wa na mopakita sa Senado.

Nahadlok si Dela Rosa sa kanunay pagpahibalo ni Ombudsman Crispin Remulla nga miisyu na og warrant of arrest ang International Criminal Court (ICC) aron dakpon si Bato nga kanhi maoy PNP Chief sa administrasyon ni kanhi Presidente Duterte.

Kinahanglan gyud nga si Dela Rosa mo-report na pagbalik sa Senado kon magsugod na ang Impeachment Trial aron makaapil siya pagbotar nga dili konbiktohon si Sara.

Kini ra ba’ng hukom sa Impeachment Court dili ra ba ni maapelar sa Supreme Court. Ang mga kongresista nga alyado sa administrasyon ni Presidente Bongbong Marcos maninguha gyud nga dili makadagan si Sara pagka presidente sa 2028 Presidential Elections.

Sigurado ko nga kon makuha gani sa mga administration-allied senators ang 16 ka botos aron konbiktohon nila si Sara, pakapinan gyud nila kini og penalty nga did-an na si Duterte nga makahupot pa og bisan unsa nga katungdanan sa kagamhanan.

Sa ato pa, dili na kini makalansar pagka presidente sa 2028. Dili malalis nga karon pwerteng sikata ni Sara sa katawhan. Samot na gyud kon dunay mahitabo ni Digong nga gipriso karon didto sa Netherlands, mosutoy ang kasikat ni Sara ug wa na’y makapilde kaniya sa pagka presidente.

Ang mga senador nga mobotar aron ikonbikto sa Impeachment si Sara, siguradong yam-iran sa mga botante nga supporters sa mga Duterte.