Alas ni Sara: Bank waiver
Kon tuohan ang kampo ni Bise Presidente Sara Duterte nga dili bakak ang iyang statements of assets, liabilities and net worth (SALNs) nga wala maghisgot sa binilyon ka pesos nga nisulod-gawas sa iyang bank accounts sa niaging 20 ka tuig, dunay duha ka posibleng lusot:
Una, ang kuwarta gipanag-iya sa iyang mga higala nga igo lang gipakuptan niya maong walay obligasyon pag-apil sa iyang SALNs; ug
Ikaduha, ang kuwarta gipanag-iya sa iyang mga organisasyon o mga kompaniya nga wala mabalhin sa iyang ngalan ug busa wala madeklarar sa iyang SALNs.
* * *
Katuohan ang ilang pangangkon kon ang naglihok nga mga kuwarta niabot lang og pila ka libo ka pesos, o pila ka milyon ka pesos, ug kausa o kaduha lang sa usa ka tuig. Mas lisod dawaton ang katin-awan kay segun sa mga dokumento sa Anti-Money Laundering Council P6.77 bilyones ang kinatibuk-an nga mga kuwarta nga nisulod ug nigawas sa iyang bank accounts sa niaging 20 ka tuig. Nga sa ato pa nag-average og:
P338.5 milyones kada tuig;
P28.21 milyones kada buwan; o
P927,397 kada adlaw.
* * *
Kon dunay mga higala, organisasyon o kompaniya nga nibutang sa ilang kuwarta sa bank accounts ni VP Sara, nganong kiat man kaayong ilang mga transaksiyon?
Kon P1 milyon ang ilang kuwarta, gipalihok og 6,770 ka higayon sa 20 ka tuig, o 28 ka higayon kada buwan;
Kon P5 milyones, 1,354 ka higayon, o ka-unom kada buwan;
Kon P10 milyones, 677 ka higayon, o ka-tulo kada buwan;
Kon P50 milyones, 135 ka higayon, o ka-pito kada tuig; ug
Kon P100 milyones, 67 ka higayon, o ka-upat kada tuig.
* **
Human gi-isnab sa Korte Suprema ang iyang gipangayo nga temporary restraining order, wala na magtuo si VP Sara nga mapugngan ang mga kongresista pag-impeach niya sa ikaduhang sunudsunod nga tuig. Mosuway na lang pagkumbinser sa publiko pagsalikway sa mga ebidensiya batok niya.
Mas katuohan kon tarungon pagtubag ang 10 anyos nang mga pasangil sa ilegal niyang katigayonan. Pinaagi sa pag-detalye sa mga tinubdan, destinasyon ug transaksiyon sa binilyon ka pesos sa iyang bank accounts. Nga mas laktod ug mas epektibong mahimo kon mopirma og bank waiver.
* * *
- Latest
