EDITORYAL - Tapolan mobadlong sa magtabanog

Karong semanaha, duha ka riders  ang nabitik ang mga liog sa tanod sa tabanog diha sa Cebu Cordova Express Link. Samtang tuod tanod ra ni siya, pwede kining makapatay og tawo kung masaktohan gyud og kabitik.

Kaning tanod sa mga tabanog karon dili na parehas sa gigamit sa kaniadto nga hilo sa pangtahi nga daling mabugto, o ba kaha kanang net bag nga tuyong bungkagon aron himuong tanod sa tabanog.

Karon ang mga bata nigamit na og mas lig-ong matang sa tanod, nylon o ba kaha pamo o tanod nga gamiton sa mga pukot sa panagat. Lig-on kaayo ni ug dili basta-basta maputol.

Usahay mahagsa nalang ang tabanog apan wala pa gihapon maputol ang pamo o nylon. Ang resulta magkutay kini sa mga linya sa kuryente, mga atop sa kabalayan, mga towers ug hangtud diha sa CCLEX ug sa ubang mga kadalanan.

Kaniadto, dunay aksidente sa abyon sa Philippine Air Force diha sa Mactan, tungod sa tabanog. Gipasidan-an gyud ang tanan ug gibawalan ang pagpalupad ani duol sa tugpahanan, apil na ang mga drones. Gawas sa mga aksidente sa abyon, peligroso sab kaayo kaning mga tabanog nga moresulta sa mga sunog sa mga kabalayan kay nikutay na kini sa mga linya sa kuryente diha sa poste.

Kay kaning mga pamo o nylon threads ginama man sa polyester nga mo-absorb og tubig o ba kaha yamog nga malatayan sa kuryente hinungdan sa pagbuto sa mga transformers, ug usahay, nakakuryente na sa mga batang nagtabanog.

Pero kada summer, naa lang gihapoy mga batang magsige og palupad niini dinhi sa Metro Cebu. Way nibadlong kanila bisan ilang mga barangay officials.

Tinuod naa kanunay mga pahimangno ang kabomberohan ug mga otoridad sa mga tugpahanan batok aning tabanog, pero murag sila ray nagsige og tingog batok ana ug kutob ra pud sila pahimangno ug wala gyuy pisikal o aktibong aksyon.

Bisan ang mga LGUs o lokal nga opisyales, kapolisan, opisyales sa barangay wala gyud moseryuso pagbadlong anang mga magtabanog diha sa mga komunidad nga daghang kabalayan, mga estraktura ug uban pang puydeng masangitan.

Dili man unta lisud pangitaon ning mga nagtabanog, pero walay moako og responsibilidad.