Husay ng mambabatas nasusubok sa impeachment

Sa kasalukuyang impeachment hearing laban kay Vice President Sara Duterte, muling nasusubok ang talino at kakayahan ng ating mga mambabatas. Sa bawat interpe­lasyon, sa bawat pagtatanong, at sa bawat depensa, lumi­litaw kung sino ang tunay na may lalim ng kaalaman sa batas. Ang ganitong mga pagkakataon ay malinaw na nagpapakita kung bakit mahalaga na ang mga solon ay may matibay na background sa legal na larangan.

Kung ang isang mambabatas ay bihasa sa batas, mas nagiging malinaw ang kanyang pangangatwiran, mas ma­tibay ang kanyang pagtatanong, at mas epektibo ang kanyang paglahok sa proseso. Sa kabilang banda, ang kakulangan sa legal na kaalaman ay nagbubunga ng mababaw na diskurso at paminsan ay nagiging sagabal sa pagdinig.

Sa mga nakaraang araw ng impeachment hearing, naki­­kita ng publiko kung sino ang handa at may kakayahang maglatag ng matibay na batayan. Ang mga mambabatas na may background sa batas ay hindi natitinag sa mga tek­nikal na tanong. Bagkus, sila’y nakakapagbigay ng mas malinaw na direksyon sa usapin. Ang kanilang talino ay naki­kita sa kakayahang maglatag ng matibay na batayan na naka­ugat sa legalidad.

Hindi maikakaila na ang Kongreso ay binubuo ng iba’t ibang propesyonal. May mga galing sa negosyo, agham, at serbisyo publiko. Ngunit sa huli, lahat ng panukala at lahat ng proseso ay kailangang dumaan sa salaan ng batas. Kung nais nating magkaroon ng mas mataas na antas ng diskurso, lalo na sa mga kritikal na usapin gaya ng impeachment, dapat nating kilalanin ang kahalagahan ng legal na kaalaman bilang pamantayan sa pagpili ng mga mambabatas.

Sa huli, ang impeachment hearing kay VP Sara Duterte ay nagsisilbing paalala na ang paggawa ng batas at ang pag­harap sa mga prosesong konstitusyonal ay hindi larong puli­tika kundi seryosong tungkulin na nanganga­ilangan ng talino, integridad, at higit sa lahat, kaalaman sa batas.

Kung nais nating mas matibay na mga batas at mas ma­­ka­buluhang pagdinig, dapat nating itaguyod na ang ating mga mambabatas ay may pundasyon sa batas dahil dito nasusukat ang tunay na husay ng isang solon.