Dili motalaw

Daling gikundenar sa Department of Foreign Affairs (DFA) ang report nga gihiloan sa mga Chinese militia gamit ang cyanide ang kadagatan palibot sa Ayungin Shoal diin nahimutang ang BRP Sierra Madre nga maoy nagsilbing outpost sa mga sundawong Pilipino nga nagbantay sa teritoryo sa Pilipinas didto sa West Philippine Sea.

Gikumpirmar sa National Security Council niadtong miaging semana nga positibo sa cyanide ang tubig duol sa Ayungin Shoal. Sigun sa imbistigasyon sa Armed Forces of the Philippines (AFP) nga mga insik nga mangingisda, apan gidudahang nagsilbing mga militia sa China, ang naghimo niini sa tuyo nga mapugos ang mga sundawong nagbantay sa teritoryo sa Pilipinas pagpahawa sa ilang outpost.

Sumala sa DFA nga ang paggamit og cyanide ug ubang matang sa makahilo nga butang diha sa kadagatan dili lang irresponsible apan kalapasan kini sa 1982 United Nations Convention on the Law of the Sea (UNCLOS) diin ang China usa sa mga mipirma.

Labihan ka peligroso sa maong matang sa kemikal ngadto sa mga kinabuhi ilawom sa dagat nga maoy usa sa mga nagsilbing tinubdan sa kinabuhi sa yuta, apil na sa mga tawo nga makakaon sa isda ug ubang bahandi sa dagat nga kontaminado sa cyanide.

Kining labing awahing insidente sa West Philippine Sea nagpakita nga desperado ang China ug andam niining buhaton ang tanan aron mailog sa hingpit ang kabahin sa teritoryo sa Pilipinas.

Ila na nga gisuwayan ang pagpanghasi ug pagpanghudlat sa mga sakop sa Philippine Coast Guard lakip na sa atong mga mangingisda. Karon migamit na sila og cyanide aron mapugos ang mga Pilipino nga mobiya sa maong dapit.

Unsa pa may sunod buhaton sa China? Bisan unsa pay dautang plano sa China aron sakmiton ang teritoryong dili ila, sigurado ko nga dili motalaw ang mga Pilipino.

Dili man sama ka gamhanan ug kadunahan sa China ang Pilipinas, apan ang mga Pilipino naila sa ilang kaisog pagpanalipod sa nasud. Way gamhanang armas nga sarang makapatalaw sa mga kaliwat ni Lapu-Lapu ug Dagohoy ug sa ubang mga bayani ta nga nakigbatok sa mga mananakop sa karaang panahon.