Gikahinangpan nga sulbad

Namahayag si kanhi House Speaker Ferdinand Martin Romualdez nga dili na siya mahimong magpakahilom na lamang kabahin sa dakong isyu sa kurapsiyon sa 2025 budget ug sa pagpatuman sa mga proyektong inprastruktura ug nga dili siya mahimong mastermind ni’ng maong anomaliya. Daw nakabatyag na si Romualdez nga himoon siyang scapegoat ni’ng maong anomaliya.  Ginaingon nga ang maayong scapegoat usa ka gikahinangpan nga sulbad sa problema.  Busa, agi’g tambag sa atong mga opisyales, “Magkinabuhi unta sila sa pamaagi nga dili sila maulaw mobaligya sa ilang mosulti nga parrot ngadto sa mga libakera.” Muleeng!

Gipamolitika ang ayuda?

Gitataw ni DSWD Assistant Secretary Irene Dumlao nga dili kinahanglanon ang certification gikan sa COMELEC aron makadawat ang beneficiary sa cash assistance gikan sa ahensya.  Giluwatan ang maong katin-awan luyo sa mga taho nga gipangayoan pa ang mga drayber og kamatuoran nga sila narehistro sa COMELEC.  Kon tinuod ang maong reklamo, dayag nga adunay namolitika ni’ng kahimtanga ug gipahimuslan ang pagpanghatag sa ayuda.  Dugang reklamo sa mga driver mao nga, “Langan na gani ang paghatag sa ayuda, aduna pa gyu’y mga naapil sa listahan bisan patay na,” Madahaan!    

“No brain, no pay”

Mi-apelar si Senador JV Ejercito ngadto kang Senador Ronald “Bato” Dela Rosa nga dili na lang kobrahon sa naulahi ang iyang sweldo ug mga allowances tungod sa padayon niyang pag-absent sa mga session sa senado.  Ang punto mao nga kon ang ordinaryong mamumuo gipaubos sa “no work, no pay” rule, angay nga ipatuman usab kini sa mga public servants.  Sugyot sa akong amigo’ng abogado, aron kuno motaas ang matang sa mga sakop sa kongreso ug senado, “Dili kay “no work, no pay” lang ang ipatuman, kon dili apil usab ang “no brain, no pay” policy.”  Payyts!

Palaran nga alaut

Gitun-an karon sa kagamhanan sa dakbayan sa Sugbo ang pag-shift gikan sa cash aid nga ayuda sa mga PUV drivers ngadto sa paghatag na lang og fuel cards o ba kaha direkta nga gasoline allocation.  Gitumong sa maong laraw nga maseguro nga ang ayuda direkta nga mosuporta sa inadlaw’ng operasyon sa mga drayber.  Pinalahi kini nga pamaagi sa paghatag og ayuda kay daw malikayan ang kurapsyon.  Apan komento usab sa akong amigo, “Mahimong palaran ang gasoline station nga maoy mapilian sa city hall nga mopahigayon sa ayuda, apan mahimong alaut usab kini tungod sa baniog nga kalangayan mobayad sa gobyerno.”  Fezteleern!

Monitoring policy

Gisaway na usab ni Senador Imee Marcos ang administrasyon sa iyang igsoon nga si Presidente Marcos, Jr. tungod sa kalangay ug ka-ulahi niini sa pagmando sa pagpatuman sa fuel price adjustment luyo sa nagkaubos nga kalibutanon’g pagkunhod sa presyo sa lana ug bisan sa gahum niini human modeklarar ang presidente og national state of emergency.  Ning kahimtanga, husto ang obserbasyon sa akong amigo nga, “Gisagop lang sa atong kagamhanan ang “monitoring policy” diin ilang gibantayan kon kanus-a mohubas ang tangke sa mga sakyanan ug kon nakakat-on na ba kita pagbaktas paingon sa trabahoan.”  Pagkatoytoy!