Kon pabiling kabus

Sagunson na karon ang gubat sa lainlaing dapit sa nasud tali sa mga tropa sa kagamhanan ug sa mga rebeldeng New People’s Army (NPA).

Gawas sa mga NPA, anaa pa ang problema kabahin sa mga teroristang grupo, sama sa Dawlah Islamiya nga naghimo og kagubot didto sa kasadpang bahin sa Mindanao.

Ning milabay’ng mga adlaw, usa ka opisyal sa Philippine Army napatay sa gubat batok sa mga rebelde didto sa Mindoro. May mga sundalo sab nga namatay kay gibanhigan sa mga terorista didto sa Mindanao.

Apan kaniadtong Domingo, 19 ka giingong sakop sa mga rebeldeng NPA ang napatay atol sa gubat batok sa militar didto sa kalibonan sa Toboso, Negros Occidental.

Makaingon ta nga ang 19 nga nangamatay sa gubat sakop gyud sa NPA kay ang Communist Party of the Philippines (CPP) miangkon man nga sila mga rebelde gyud.

Gani, dunay nagpa-interview nga usa sa napatay didto sa Toboso sa Negros Occidental, iyang amahan nga rebelde nang daan sa wa pa siya matawo, ug panagsa ra mopauli sa ilang panimalay.

Human sa gubat didto sa Toboso, laing gubat tali sa mga Army ug NPA nahitabo na sab didto sa Barangay Binalbagan kaniadtong Martes, ug maayo na lang kay wa’y kinabuhing nakalas.

Ang pangutana, nganong midagsang na man sab pagbalik ang mga rebeldeng NPA? Ang NPA namugna kaniadtong Marso 29, 1969 apan hangtud karon wa gyud kini mapuo sa kagamhanan.

Ang nasud dunay kapin sa 300 mil ka sundalo, apan pakyas sila pagpuo sa mga rebelde aron nga dili na gyud makapalapad sa ilang grupo nga makig-away sa gobiyerno.

Kon ang kinabag-ang katawhan, ilabi na sa kabukiran, pabiling mag-antos sa kakabus, dali ra sila nga kumbensihon nga mosalmot pakigbatok sa kagamhanan.

Kinahanglan nga ang kagamhanan mangita gyud og paagi aron moasenso ang kinabuhi sa katawhan sa bukid, ug mabatyag nila nga wa sila pasagdi sa gobiyerno, aron dili sila matintal sa mga rebelde nga moagni kanila pag-apil sa ilang kawsa.

* * *

Nabalaka ko nga nagtan-aw sa mga tinun-an sa University of the Philippines (UP) nga kaniadtong Martes misalmot sa pagpahigayon og rally tungod kuno sa pagsaka pag-ayo sa prisyo sa petroleum products.

Kini gud nga pag-apil sa mga rally maoy unang lihok, nga sila mahimong aktibista, ug dayon mosukol na sila sa kagamhanan. Dili ikalimod nga dunay daghang tinun-an sa UP nga nabiktima kay nakumbinser gyud sila pagsalmot sa mga rebelde.

Busa kamong mga ginikanan, bantayi ang inyong mga anak.