Missing the Mark

Basaha: Jn. 6;22-29

Daghan sa mga tawo ang nangita kang Jesus human sila makasinati sa milagro nga iyang nahimo nga mao ang pagpadaghan sa pan.

Sa dihang ilang nakit-an sila gibati nila ang tumang kalipay ug kahinangop. Apan giprangkahan sila sa atong Ginoo nga ang tumong ug tuyo sa ilang pagpangita kaniya mao man nga sila nabusog sa mga pan nga gipadaghan niya.

Missing the Mark kining maong hitaboa. Tungod kay nakalimot sila nga dunay mas mahinungdanon pa kaysa pan nga ilang nakaon ug nakapatagbaw kanila. Nakalimot sila nga mas mahinungdanon nga motuo sila sa gipadala sa Dios nga mao Siya.

Ingon ini usab kita. Usahay atong gisud-ong ang Ginoo segun sa iyang  mahimo alang nato. Ang atong mga pag-ampo ato mang giiisip nga mura og mga vending machine nga human nato mahulgi og salapi ilugwa dayon ang atong gusto nga produkto.

Maingon nga ang ATM mo-dispense dayon sa kantidad ngaatong gi input sa atong pagahimoong withdrawal.

Nakalimit kita nga ang pag-ampo pakig date sa Ginoo kun pakig bonding Niya sanglit mahinungdanon kaayo Siya alang kanato. Sama sa usa ka hinigugma nga mogahin gyud og panahon alang sa iyang hinigugma aron sa ingon mas makaila pa siya kaniya.

Sa atong panaw sa kinabuhing espirituhanon uban nato ang Dios ug gani anaa siya halos sa tanang mga yugto sa atong kinabuhi. Unta atong himoon ang maong kamatuoran ingon nga pryoridad kay halayo ra ba Niya wala gyud kitay mahimo. (cf. Jn. 15;5)