P20/kilo nga bugas mapalit sa mga bukirang brgy sa siyudad

CEBU, Philippines — Gipahibawo ni Cebu City Mayor Nestor Archival ang mga barangay nga maoy sunod nga makapahimulos sa Benteng Bigas Program diin mapalit ang bugas nga tag P20/matag kilo.

Sa iyang post giplastada na ang skedyul sa mga barangay sa North ug South District ilabi na sa mga mountain barangay aron masiguro nga makaabot kini sa mga residente

Ang maong programa giabagan sa National Food Authority and Food Terminal Incorporated, nga naghatag og unang pagtagad sa mga senior citizens, persons with disabilities, solo parents, farmers, ug fisherfolk, nga kinahanglan mopakita og valid identification aron makapahimulos sa limitado nga supply.

“Padayon ang atong paningkamot nga mahatagan og barato nga bugas ang matag pamilya pinaagi sa Benteng Bigas Program, usa ka proyekto sa National Food Authority (NFA) ug Food Terminal Incorporated (FTI) in partnership with the Cebu City Government,” pagbasa sa post ni Mayor Archival.

Sa North District, ang distribution himoon karong adlawa Abril 20 sa barangay Sirao, sundan sa brgy Adlaon sa Abril 21, Taptap sa Abril 22, Malubog Abril 23, Budla-an sa Abril 24, Pulangbato Abril 27, Binaliw Abril 28, Bacayan, April 29, ug Pit-os sa Abril 30.

Samtang sa South District, himoon ang distribution sa brgy Sudlon 1 karong adlawa, Bonbon sa Abril 21, Pamutan sa Abril 22, Buhisan Abril 23, Sinsin Abril 24, Toong Abril 27, Sapangdako sa Abril 28, ug Kalunasan sa April 29.

Limitado lang ang supply hinungdan nga gidasig ang mga residente sa pag-adto og sayo sa mga designated areas.

Ang unang pag apod apod sa tag P20/kilo nga bugas gihangop sa mga residente apan daghan ang nihangyo sa siyudad nga dad-on usab kini ngadto sa matag barangay aron makadaginot sila sa plete.

Sa nasayran kining maong programa maoy kabahin tinguha sa Department of Agriculture nga mahatag ang gisaad nga tag P20/kilo nga bugas nga unang gipatuman sa Metro Manila niadtong tuig 2025. Gikan sa The Freeman/MEL BANAT NEWS