“Fuel of the masses”

Laing pagkunhod na sab sa presyo sa mga produktong petrolyo ang gipaabot karong semanaha, segun sa pahibawo ni Presidente Bongbong Marcos niadtong weekend. Mao ni ikaduhang higayon nga makasinati ang publiko og pagmenus sa presyo human sa sagunson nga pagsaka taliwa sa kagubot didto sa Middle East.

Apan bisan kapin sa P20 matag litro sa diesel ang gipaabot nga pagkunhod karong semanaha, anaa pa gihapon sa kapin sa P100 matag litro ang presyo niini. Labihan pa gihapon ka taas itandi sa normal niini nga presyo sa wala pa moulbo ang kagubot didto sa Iran.

Wa pay siguro kun di ba mosaka pagbalik sunod semana labi pa nga gisirad-an na sab pagbalik sa Iran ang Strait of Homuz nga maoy agianan sa mga barko nga magkarga og petrolyo paingon sa Asya.

Nagping-it na ang publiko ug ang labing apektado mao ang mga kabus. Daghan na ang nawad-an sa trabaho tungod kay ang ilang mga kompaniya napugos paghunong sa operasyon. Ang mga ayuda gikan sa gobiyerno hapit way epekto tungod sa kamahal sa presyo.

Ug taliwa niining labihan ka lisod nga kahimtang, dunay sugyot ang usa sa mga senador ta nga isuspenso sa labing daling panahon ang excise tax sa diesel tungod kay mao ni sagad gigamit sa public transportation.

Si Senador Sherwin Gatchalian kumbinsido nga kun way excise tax ang diesel mas mapakunhod pa ang presyo niini ngadto sa mas ubos kay sa P100 matag litro.

Dunay punto si Gatchalian tungod kay krudo maoy sagad gigamit sa PUJ, Bus ug bisan na sa mga power plants sa mga isla diin mga kabus maoy direktang apektado.

Iyang gihulagway nga ang diesel maoy "fuel of the masses" nga angayang maoy unahon pagsiguro sa gobyerno nga affordable ang presyo.

Giwiktan sab ni Gatchalian ang administrasyon tungod sa haguka niini nga baruganan pagpatuman sa hingpit sa balaod nga nagsuspenso sa excise tax sa fuel. Iyang gisaway ang administrasyon sa pagduso sa maong balaod apan nagduha-duha sa hingpit nga pagpatuman niini.

Mahimong nisakay lang si Gatchalian sa panahon aron magpahumot sa publiko. Apan angayang ihiklin usa ang mga pagduda nga namolitika lang ang senador ug maoy tan-awon ang unod sa iyang mensahe.