EDITORYAL — Nagtabunay lang

Kaning kurapsyon sa Pilipinas dili ni masulbad tanan tungod kay ang mga kunohay gitahasang mogukod ug motaral sa mga nalambigit nagprotektahay sa ilang mga kaugalingon.

Pagkatinuod lang, hagbay ra gyud unta ni nangahuman ang problema kung limpyo pa tanang mga naa sa posisyon, apan mura og pipila ra man o maihap sa tudlo ang mga tarong.

Ang sistema gud karon, tanan dunay gisandigan ug gisaligan nga proteksyon. Ug ang ilang mga protektor naa sa mas taas nga posisyon o ba kaha dako og tsansang makalingkod sa kinatas-ang pwesto o dunay pinakataas nga gahum sa gobiyerno.

Mao nga imbes nga maukay ang tanang baho, magdepensahay ug magtinabangay sila og tabon, liku-likoon ang mga imbestigasyon, tuison ang kamatuoran, sumbalikon ang ilang mga kaatbang sa politika ug labaw sa tanan, pangitaan og paaging masalbar ang tawong gusto nilang palingkuron kay kani sab mao unyay motabong sa ilang pangbuhatong pangurakot ug nabuhat ng kurapsyon.

Sa pagkakaron, naglanog-lanog lang diha sa social media ang mga nagtigi nga opinyon, komento, baruganan ug pagtuo sa mga tawo. Murag dunay gubat sa social media tali sa managlahing mga posisyon sa mga tawo.

Kini ang mga tawong adunay personal pud nga interes, kung dili sa negosyo o gahum, interes nga personal ang ilang gibarugan kay gusto sila nga ang tawong ilang gustong mokupot og gahum mao gyuy  makalingkod, sa laktod mga panatikong supporters sa mga politiko o political clans.

Dili ni ikalimod, makita ug maobserbahan ni diha sa Kongreso, gikan sa Ubos Balay Balauranan hangtud sa Senado. Dunay mga indibidwal, direkta man o dili direktang nalambigit sa usa ka kaso o mga kurapsyon ang giprotektahan o ba kaha gitabangan og kuninit sa mga magbabalaud.

Makadaghang higayon na man gud nga dunay mga desisyon ug resolusyon gikan sa Kongreso sa mga gipang-imbestigar nilang mga anomalya o mga alegasyon–dili man tuod klaro, pero duna gyuy impluwensiya gikan sa pinakataas nga lebel sa gahum sa gobiyerno.

Sa laktod, bisan ang kampanya kontra kahiwian ug iregularidad sa mga opisyal sa gobiyerno –naa lang nagtuyok sa mga kamot sa mga posible pud dunay tinagoang baho.

Depende nalang kung  kinsa ang giimbestigar ug kun kinsa ang nag-imbestigar ug kung kinsa ang naglingkod sa Palasyo.