Di ta palupig! Ngano bitaw no?

Ang siyudad sa Sugbo, dako kaayo og revenue sa tanang siyudad dinhi sa Central Visayas, apan ang mga opisyal sa Cebu City wa man gyud makapatukod og Cebu City College?

Kutob ra sila sa plano diha sa ilang hunahuna ug isulti nila ngadto sa mga sakop sa media. Ang mga sakop sa media, igo ra sab tawon nga mobalita apan wa gyud matuman.

Lupig lang ta sa Talisay City ug Mandaue City, nga unta kining mao nga mga siyudad mas menos man og revenue kon itandi sa Cebu City. Tan-aw nako niini, kutob ra sa tabi ang atong mga opisyal.

Kon kuwarta man gani ang hinungdan nga wa ta makapatukod og city college, mapangitaan ra kini og paagi. Nganong ang Talisay City nakapahimo man lagi og Talisay City College, ug ang Mandaue City, duna sab?

Basin og dili na mahunahunaan ni Mayor Nestor Archival ang ubang mahinungdanong gimbuhaton kay aku-akohon man gud niya ang hapit tanang kalihokan.

Ang nindot unta ni Mayor Archival, itugyan niya sa iyang mga sinaligan ang mga sayon ra nga trabaho, ug dili na kay siya gyud ang mangunay sa pag-atiman.

Pananglit ribbon-cutting sa usa ka proyekto, iya pa man nga tambongan. Dunay mayor kaniadto nga akong nabantayan, itugyan niya kini sa mga sinaligan niyang konsehal.

Pagka karon, daghan na ang nahiubos ni Mayor Archival kay gitan-aw nila nga nausab na kini sa iyang batasan human nga nakadaog pagka mayor. Gipangutana ko nila kon ingon niana ba gyud diay kon mayor ka na? DI na gani kuno motubagh kon tawgon.

Giingnan ko ang nangutana nako nga "busy" na man gud. Pero si Tommy Osmeña kaniadto, Edgar Labella, ug Mike Rama dihang mayor pa sila, kon dili man makatubag dayon, pero motawag gyud.

Kaniadto, sa nangaging mga mayor, duna gyuy quarterly river clean-up. Mga kawani sa City Hall manglimpyo sa kasapaan sa adlaw nga Sabado, pero karon sa administrasyon ni Archival, wa na kini himoa.

Sa administrasyon ni kanhi Mayor Alvin Garcia, dunay excavator nga ipakanaog sa sapa og kon dunay mga nagliundok nga mga lapok, mao kini ang mokandos ug ikarga sa dump truck, apan karon wala na kini himoa.

Ang tinuod, daghan kaayo nga angay’ng himoon sa siyudad nga tingali dili na maato sa paghunahuna sa mayor, ug kinahanglan kini nga isilsil niya sa alimpatakan sa iyang mga sinaligan nga kini maoy angay’ng himoon aron maayo ang pagkadumala niya sa dakbayan.

Apan may panahon pa, dili pa uwahi ang tanan kay layo pa ang Mayo 2028 nga maoy katapusang adlaw sa iyang termino.