Plano ni Sara
“Sa inyong mga kinabuhi,” nitambag si Bise Presidente Sara Duterte sa iyang diskurso sa niaging buwan, “daghan ka og himuong kausaban. Nagkinahanglan ka og Plan A, Plan B ug Plan C. Kay sa atong mga kinabuhi… dili kita maoy nagkontrolar sa atong mga kinabuhi.”
Ambot unsa na nga plano ang gipatuman ni VP Sara, kon gituman ang iyang kaugalingong sulti. Pero daghan na uyamot nga kausaban ang iyang gihimo sukad gipasakaan sa articles of impeachment sa niaging tuig hangtod gibanhaw ang mga pasangil karong tuiga. Palihug, suwayan nato og subay.
* * *
Plan A: Gihudlat ang mga kongresista ug mga senador og bloodbath sa iyang impeachment trial;
Plan B: Nag-organisar sa iyang defense team, apil ang iyang amahan ug ugangan;
Plan C: Dihang gi-impeach sa mga kongresista sa Pebrero sa niaging tuig, gikuwestiyon atubangan sa Korte Suprema ang constitutionality sa proseso;
Plan D: Kay wala may temporary restraining order, gigamit ang kasuod nilang kanhi Senate President Chiz Escudero pagyaka sa impeachment sulod sa lima ka buwan;
* * *
Plan E: Dihang gibasura sa Korte Suprema ang articles of impeachment, gipasalamatan ang 13 ka mahistrado nga nipabor niya, apil nang 11 nga tinudlo sa iyang amahan, usa nga tinudlo ni anhing Presidente Noynoy Aquino ug usa nga tinudlo ni Presidente Ferdinand Marcos Jr.;
Plan F: Pagkadungog nga banhawon ang impeachment karong tuiga, giduaw sa prisohan si Ramil Madriaga nga nangangkon nga iyang gisugo pag-apud-apod sa confidential funds ngadto sa iyang classmates sa College of Law ug ubang mga kaila;
Plan G: Dihang gidawat sa House Justice Committee ang duha sa upat ka impeachment complaints batok niya, nitubag ang iyang mga abogado ug abogada ginamit ang technicalities;
* * *
Plan H: Gi-isnab niyang imbitasyon sa mga kongresista sa pormal nga pagsugod sa ilang hearing proper niadtong Marso 25;
Plan I: Nagpalaban na sab sa Korte Suprema aron mabadlong ang impeachment proceedings bisan nipasalig ang mga kongresista nga igo lang silang nisunod sa sugo sa labawng hukmanan; ug
Plan J: Dihang wala na sab moluwat og temporary restraining order ang Korte Suprema, gibisto nga patay na si Presidente Ferdinand Marcos Jr. ug si House Speaker Bojie Dy posibleng mapulihan ni kanhi Presidente Gloria Arroyo.
* * *
- Latest
