Cebu

Namahayag si Department of Secretary Sharon Garin nga lisud nang mabalik pa ang presyo sa lana sa ubos pa sa P60 kada litro bisan pa man og matapos na gyud sa hingpit ang giyera didto sa Middle East.

Sa interbyu sa iya sa dzBB, ang iyang rason sa iyang pamahayag kini tungod daw sa structural damage o nangagubang imprastraktura didto sa Middle East.

Tinuod man nga daghang mga oil refineries ug oil depots didto sama sa United Arab Emirates ug bisan sa Iran ang nangaguba tungod sa pagbawos-bawos og pamomba sa US, Israel ug Iran. Didto lang ang damage , wala dinhi sa Pilipinas.

Nganong moingon man si Garin nga kuli na o dili na mabalik sa ubos sa P60 ang presyo sa lana kung mabalik na sa normal ang supply sa lana?

Di ba diay maningkamot ang mga gulf states kansang mga pasilidad sa lana naigo sa mga pag-atake nga ayuhon kini aron mabalik ang ilang normal nga operasyon?

Bisan tuod og mogasto og dako kaning maong mga nasura sa pagpaayo sa ilang mga pasilidad, dili man pud tingali motugot ang kalibotanong merkado nga magpadayon kining krisis bisan og wala nay giyera.

Kung pananglitan maayo na nila ug mabalik na ang normal nga operasyon o tingali mas padak-an pa o ipalayo pa gyud ang lokasyon gikan sa potensiyal nga mga umaabot nga pag-atake, dili diay mabalik pagus-os ang presyo sa lana?

Murag dili kaayo maayong paminawon ang gipamahayag ni Garin kay makapasamot man hinuon sa kasamtangan karong nasinating kabalaka ug kawalay kasiguroan sa mga tawo. Sa laktod, dili makabuhi og dugo sa mga tawo ang iyang gipamulong. Wala gani bisan gamay nga lama og paglaum nga makuha ang katawhan gikan sa iyhang gipanulti.

Sa ato pa, wala gyud diay gihapon silay planong maghimo og malungtarong solusyon aron dili na maingon ani ang gigrabehon sa epekto matag duna napuy laing krisis sa Middle East sa mosunod nga mga katuigan?

Wala lang gihapoy leksyon nga nakat-onan ang kasamtangang gobiyerno aning krisis karon? Pagkaluoy pud unya sa mosunod pang mga henerasyon kung naa nasay sama ani nga krisis sa ME!