Balik sa naandan

Basaha: Jn. 21;1-14

Human sa hitabong paglansang ug kamatayon sa atong Ginoo ang iyang mga tinun-an labina si Pedro ang pangulo ug sinaligan niya ang nakahukom nga managat.

Ang pagpanagat maoy ilang naandan nga panginabuhian. Ang pagpanagat maoy ilang ekonomikanhong seguridad ug anad sila niini.

Tingali nisantop sa hunahuna ni Pedro ug mga kaubanan nga nahimong pakyas ang ilang misyon human sa kamatayon sa ilang magtutudlo.

Busa namasin sila nga sa paglabay og balik sa ilang pukot mamahimong Seguro na usab sila sa ilang panginabuhian.

Ning paagiha tingali ilang mahikalimtan ug malubong sa kalimot ang ilang nahiagoman nga kapakyasan ug ang eskandalo sa krus.

Apan ang ilang magtutudlo nipakita nila sa paagi nga siya nagpakita nga sila iyang gitawag kaniadto. Ang kukabildo susama ra kaniadto. Wala silay kuha bisan pa man kun naghago sila tibuok gabii.

Gisugo sila sa Ginoo nga magpalawod ug motaktak sa ilang mga pukot sa tuong bahin. Ning paagiha, nakakuha sila. Nag-andam pa og uling aron kasugbaan sa mga isda nga ilang nakuha. Usa sa iyang mga kaubanan nagkanayon: “Ang Ginoo ka na!”

Ang maong pagpakita sa Ginoo nipahinumdom kanila nga dili talikdan ang bisan unsang nasugdan. Hinunoa ang bisan unsang nasugdan kinahanglang padayonon.

No turning back matud pa. sa atong panaw sa kinabuhi dunay mga higayon nga nahimo kitang mahisalaag ug mawad-an sa paglaum.

Adunay uban nato nga nahimo kitang maglagot kita sa atong isigkaingon ug dili kita mahimong manggihatagon gumikan sa atong mga biases sa atong isigkaingon. Padayon kitang magpuyo sa paagi nga makahuloganon.