Bagahe sa bakak
Pagkadungog nako nga na-alarma ang Malakanyang sa pagbaha sa fake news nga grabe nang kanser ug namatay na gyod gani ang presidente, una nakong reaksiyon mao nga nakatilaw si Ferdinand Marcos Jr. sa iyang kaugalingong kabuang.
Kay fake news ang usa sa nakapabalik sa mga Marcos sa Malakanyang: Pagpatuo nga golden years ang martial law ni Ferdinand Marcos Sr. (bisan nabangkarota ang nasudnong ekonomiya tungod sa iyang kawat); ug pasalig nga ipanghatag ang Tallano gold (bisan sa taphaw nga pangangkon ni Marcos Jr. nga wala kakita og bisan unsang gold).
* * *
Hilas paminawon ang administrasyon nga nagpalaban sa katawhan. Kay si Marcos Jr. padayong nipakatap og fake news:
Gipamugos ang Maharlika investment fund (nga nisunod sa bakak ni Marcos Sr. nga iyang Maharlika guerilla unit nakapalangay og pila ka adlaw sa pagkahagsa sa Bataan (bisan napamatud-an sa US Army nga walay guerilla unit si Marcos Sr., wala ka-engkuwentro sa mga Hapones ug nangilkil hinuon ginamit ang Maharlika); ug
Gipamugos ang Kadiwa centers sa tokar-tokar nga P20 nga bugas humay (orihinal nga Kadiwa ni Marcos Sr. utrong inutil og dakong alkanse).
* * *
Tambag sa katiguwangan pagbalaan sa Semana Santa ug batok sa pagpanunglo nalapas sa fake news nga namatay na si Marcos Jr. sa niaging semana. Ambot duna bay makiangayong limitasyon kanus-a ug unsa ray fake news nga masabwag.
Lisod lalison ang pagduda, kay wala may laing posibleng rason, nga ang fake news gitumong pagtay-og sa gobyerno atubangan sa krisis nga namugna sa gubat sa Iran ug sa impeachment proceedings batok ni Bise Presidente Sara Duterte.
* * *
Mabadlong bang fake news sa mga panghulga sa kaso? Dili na ba tuohan kon mapamatud-an nga mga Duterte maoy nagpasiugda? O mas epektibong mapahilom kon i-livestream ang inadlaw nga pagkugi ug tinuod nga pagtabang (hinaot pa unta nga dili pagpa-epal lang) sa presidente sa tanang naapiki sa krisis?
Tanang pasalig nga himsog ug buhi ang presidente mabira sa bug-at nga maksaysayanong bagahe: Iyang amahan, si Marcos Sr., gibandilyo sa makinarya sa propaganda sa diktadura nga takos nga nagkontrolar sa nasud pero nabisto nga seryuso diayng masakiton dihang napalayas na sa Malakanyang sa Edsa People Power Revolution niadtong 1986.
- Latest
