Pilion ang "dakong yawa"

Matud pa ni Energy Secretary Sharon Garin, mokabat sa P170 bilyones matag tuig ang gibanabana nga makaltas sa pundo sa nasud kon tangtangon ang VAT sa mga produkto’ng petrolyo.  Kon supak ang mga politiko nga wagtangon ang VAT sa mga produktong petrolyo, unsa kahay maayo kon sila ang atong tangtangon? Daw alang kanila, ang desisyon kon wagtangon ba o dili ang VAT nahisama sa pagpili kon hain sa duha ang “lesser evil” Pahimangno sa akong amigo, “Ayaw pilia ang “gamay’ng yawâ,” hinunoa, pilia kadto’ng “dakong yawâ”, kay gawas nga taas ang kalidad niini, dugay usab kini maguba.”  Madahaan!

Sayop apan makapahimoot

Gisaway ni Palace Press Officer Claire Castro ang matud pa niya, “iresponsable” nga tubag ni Bise Presidente Sara Duterte kabahin sa pangutana kon unsay iyang reaksyon sa kahimtang sa panglawas sa predisente, diin mitubag lang ang bise presidente nga, “Good Luck,” inubanan kuno sa pahiyom.  Angayan usab tingale hinumduman ni Castro nga sa makadaghang higayon, iyang gitirahan ang bise presidente.  Mora’g kaso kini sa giingon nga “wala’y sukod sa bawos.”  Apan gipahimangnoan usab kita nga, “Ang pagpanimalos dakong sayop…ug makapahimoot usab.”  Atala lagee!

Nakahimo’g kriminal

Bisan sa kutay sa mga katalagman ug sa padayon nga pagkahugno sa atong ekonomiya, masaligon ang Bureau of Internal Revenue sa Cebu nga makuha gihapon niini ang target sa 2025 income tax. Mipasalig usab ang BIR nga tugbangan nila’g maayo’ng serbisyo ang ibayad nga buhis.  Sa atong kasinatian nga kawaton lang sa mga kurap nga opisyal ang atong buhis, bug-at kaayo ang buot sa katawhan pagtuman ni’ng kamanduan.   Husto ang panahom nga “Ang income tax mas nakahimo og daghang kriminal kay sa bisan unsa’ng binuhatan sa kagamhanan.”  Muleeng!

Nalit-ag nga ilaga

Nagsugod na pagpang-apod-apod ang Cebu Provincial Government, kaubanan ang LTFRB-7, og tag-10 kilos nga bugas ngadto sa mga PUJ drivers didto sa hawanan sa Kapitolyo niadtong Abril 9, 2026 isip suplementong alibyo sa kalisod nga gisagubang sa mga driver tungod ni’ng padayong pagsaka sa presyo sa gasolina.  “Band-aid” nga solusyon na lang ba gayud ang mahimo sa gobiyerno? Mao kana’y giingon nga, "Nahisama na lang intawon ang mga driver sa ilaga nga nakakaplag og garapon nga puno sa pagkaon.  Malipayon kini hangtud nga nahurot ang pagkaon ug diha pa niini nasayran nga nalit-ag ug napriso na diay kini.”  Fezteleern!

 “Zero-hi” na lang

Nakatawag og pagtagad ang resulta sa March 2026 Physicial Licensure Examination human gipugngan una sa Proffesional Regulation Commission (PRC) ang pagbutyag sa highest-ranked nga examinee.  Suta-on pa kuno sa PRC ang mga liabilities sa hingtungdan ubos sa lagda sa komisyon kabahin sa maong pasulit.  Wala matataw kon unsa ang mga liabilities apan posible nga lakip niini ang pagpanikas.  Angayan resolbahon kay nakahatag kini’g pagduda sa kredibilidad sa examination.  Makapahinumdum sa anak sa among silingan nga naglisod pagtubag sa pasulit busa miingon na lang sa iyang maestra nga, “Zero-hi na lang ko Maam.  Mouli na ko kay gutom na.” Pagkatuytoy!