Angay sundon

Napahimuslan gyud sa anak sa usa ka kabus nga magtiayon ang programa sa kagamhanan nga naghatag og tabang sa mga nanginahanglan, pinaagi sa gitawag og Pantawid Pamilyang Pilipino Program (4Ps).

Anak og usa ka beneficiary sa 4Ps dinhi sa Cebu nahimong Top-1 sa Licensure Examination for Civil Engineer nga gihatag sa Professional Regulation Commission.

Garbo sa mga Sugboanon, ilabi na sa Cebu Technological University-Dumanjug Extension Campus, ang bag-ong engineer nga si Rico Q. Olao, taga lungsod sa Alegria, southern Cebu

Wa ikauwaw ni Olao ang pag-angkon nga ang 4P's dako kaayo og natabang sa iyang pamilya nga nakapahuman kaniya sa pag-eskwela ug migradwar siya nga Magna Cum Laude sa kurso nga Bachelor of Science in Civil Engineering, major in Structural Engineering.

Matud ni Olao nga ang iyang kalampusan, ipasidungog niya ngadto sa iyang mga ginikanan nga naningkamot gyud pag-ayo, kanunay'ng mihatag kaniya og inspirasyon ug migiya sa maayong mga pagtulon-an.

Ang kadagkoan sa Department of Social Welfare and Development (DSWD) Field Office-7 Central Visayas, gibati usab og dakong garbo sa kalampusan ni Olao.

Ang kagamhanan, pinaagi sa DSWD, miabag sa paghatag og cash assistance ngadto sa mga pamilya nga naglisud sa panginabuhi, apan ubos sa kondisyon nga ang ilang mga anak, ila gyud nga papadayonon sa pagtungha.

Pwerteng daghana nga 4Ps beneficiaries sa tibuok nasud. Maingon nato nga ang mga gihatagan og tabang sa kagamhanan kadto gyud nga angayan tabangan. Daghan ko og nahibaw-an nga nakapahuman gyud sa ilang mga anak pinaagi sa tabang sa 4Ps, apan kini lang maoy akong gihimoan og feature story, kay Top 1 man gud sa licensure examination.

Samtang daghan sab ang nakagradwar sa pag-eskwela sa mga anak sa beneficiaries sa 4P’s, apan ubay-ubay sab ang mga pamilya nga giusikan lang ang kahigayonan nga gihatag unta kanila.

Ubos sa maong programa, kinahanglan nga ang kwarta nga ihatag sa Department of Social Welfare and Development (DSWD) kada tulo ka buwan, kinahanglang ayuhon gyud paggamit.

Ang mga anak nila paeskwelahon gyud, ug kon ang mga inahan sa magtiayong 4Ps beneficiary magmabdos, kinahanglang magpa-prenatal gyud.

Apan duna ko’y nahibaw-an nga ang ubang 4Ps beneficiaries migamit sa kwarta nga madawat nila gikan sa gobiyerno sa pagsugal, paghubog-hubog, ug pagwaldas sa kwarta, ug wa na maka-eskwela ang ilang mga anak.

Tungod niini, nahibaw-an sa DSWD, aw gihunong ang paghatag og financial assistance ngadto sa maong 4Ps beneficiary. Anugon no? Busa akong gisuwat kining kaagi ni Olao aron makuhaan og leksiyon sa uban.