Editoryal — Mga hakog nga retailers

Nakasinati gyud og kalisod ang ubang mga yanong Pilipino karon tungod sa krisis sa lana bunga sa kagubot didto sa Middle East.  Mao nga ang baratong mga presyo sa baligyang pagkaon sama sa mga utanon, lamas ug prutas diha sa kamerkadohan dako na kaayo og tabang para sa tanan.

Sama nalang diha sa Carbon Public Market nga ning naglabay nga mga adlaw ning semanaha, barato kaayo halos tanang mga baligyang utanon ug mga lamas bisag nimahal ang presyo sa petrolyo.

Ang gobiyerno nipagawas og bilyones ka pesos para ayuda ug subsidiya para sa mga biyahidor og pagkaon tibuok nasud. Tumong ani nga dili ipasa ngadto sa mga kunsomidor ang pagsaka sa presyo sa lana.

Pero bisan sa kabarato sa mga baligya karon diha sa Carbon Public Market sa Cebu City, nganong pwerte mang mahala gihapon sa mga presyo sa mga utanon, lamas, ug uban pa sa mga satellite markets ug mga tindahan sa kabarangayan dinhi sa siyudad?

Dili tanan makahigayon og adto sa mga merkado ilabi na kun ang kaya sa ilang kwarta mao lang ang para sa sunod nga tingkaon lang. Ang madali-dali nila mao ning mga satellite markets o mga sari-sari stores sa ilang barangay.

Sanglitanan niini dunay mga barangay nga namaligya diha og mga retail nga utanon ug lamas. Pero ang presyo walay pagkubos sukad sa pagsugod aning krisis.

Ang kamatis nga usa ka buok P8 kada usa(medium size), ang siling espada P5 tulo ra ka buok ug daghan pang uban nga pulos tanan mahal. Pero sa Carbon, wala gani makaabot og P100 ang kada kilo ani ning semanaha.

Ang rason naninda  niingon nga mahal daw ilang palit ani sa Carbon Market.

Maayo tingali nga tutokan sab sa mga hingtungdang ahensiya o departamento sa Cebu City Hall ang price monitoring sa mga satellite markets sa kabarangayan.

Kay anha man gyud pirme ang binuang sa grabeng pagpaburot sa presyo. Mura og di na mabati sa mga yanong tawo ang paningkamot sa gobiyerno nga mapagaan ang krisis karon tungod aning mga bentahoso ug hakog nga mga retailers.

Sa mga panahong sama ani dapat  naay barangay price monitoring  nga motandi sa presyo sa Carbon Public Market.