Tagamtamon nga may kahimuot

Namahayag si kanhi Energy Secretary Jericho Petilla nga bisan  pa sa posibilidad nga matapos na ang kagubot sa Middle East, padayon pa gihapon’g sagobangon sa katawhan’g Pilipinhon ang taas nga presyo sa gasolina tungod kay daghan mga refineries ug oil extraction facilities nga nangaguba ug kinahanglan pa’g panahon aron ma-repair.  Daghan pa diay’ng sakripisyo ang pagabuhaton sa katawhan aron molahutay kita ni’ng maong krisis. Apan sa kinaiya sa mga Pinoy, masagubang ra gihapon nato kining tanan “Basta tagamtamon lang nato ang makapahimuot nga bahin sa mga pag-antos ug kalisdanan,” Madahaan!

PANUNGHON UG BALIKASON

Milusad og imbestigasyon ang Philippine National Police (PNP) aron matumbok ang mastermind luyo sa illegal nga “pa-ihi scheme” sa mokabat P9.75 milyones nga diesel didto sa fish port sa Navotas City.  Ang modus sa “pa-ihi scheme” mao ang pagbalhin sa kargada’ng fuel gikan sa mga oil tanker ngadto sa mga gagmay nga storage containers.  Giingon nga kini’ng pagpunay’g saka sa presyo sa gasolina dili tungod lang sa kanihit niini kon dili tinukmod gayod sa kahangol ug kamapahimuslanon sa mga negosyante.  Dili nato mabasol kon makapamalikas ang katawhan sa mga negosyante sa pag-ingon nga, “Maka-ihi pa unta sila’g krudo ug maka-libang og tagâ.”  Saoonz!

KULANG ANG EBIDENSYA?

Agi’g tubag sa gibutyag nga laraw sa Ombudsman nga pasaka-an niini og kasong plunder si Senador Francis Escudero ug Kongresman Martin Romualdez, gitataw sa Malacañang nga pinasikad lamang sa ebidensya ug dili sa dinali-dali’ng paghukom ang giya sa kagamhanan sa pagtubag sa flood control scandal. Morag gihanigan na man daan sa administrasyon kining maong kaso bisan wala pa mapasaka.  Apan alang sa katawhan, tataw na man ang ebidensya ug  kalambigitan sa duruha sa anomaliya sa flood control projects.  Haum dinhi ang panultihon nga “Ang pagka-walay ebidensya, wala baya magmatood nga kulang o walay ebidensya.”  Muleeng!

MANDOAN ANG DILI MOTUMAN

Gikwestiyon sa Samahan ng Progresibong Kabataan (Spark) ang pagpatuman sa DILG sa “Safer Cities Initiative” diin ginadili na ang pag-inom sa kadalanan, ang maghukas sa publiko ug ang pag-videoke bisan lawom na ang kagabhion.  Matud pa nila, ang PNP adunay track record sa usa ka subjective nga pagpatuman sa balaod nga miresulta sa harassment sa kabatan-onan. Dili usab ikalimod ang dayag nga kakulang sa disiplina sa atong kabatan-onan.  Angayan tamdan ang panultihon nga, “Kinsa kadtong dili maantigong motuman sa iyang kaugalingon, kinahanglan’g pagamando-an, kay mao kana ang kinaiya sa mga buhing nilalang.” Fezteleern!

TANAN APEKTADO

Tungod sa padayong pagsaka sa presyo sa gasolina ug sa nagkanihit nga pasahero, adunay mga transport cooperatives nga naglaraw nga suspendihon una nila ang ilang operasyon.  Kon mahitabo nga mohunong pag-operate ang mga transport cooperative, tataw nga mapiang gayod ang transportasyon sa Sugbo.  Apektado ang tanan ni’ng maong krisis ug dili kay mga driver ug operator lamang.  Busa agwanta lang kay matud pa bitaw sa pinalahi nga linya sa himno sa simbahan, “Walay bisan kinsa nga nag-antos, sa kaugalingon lamang. Kitang tanan adunay suliran sa usag-usa.”  Pagkatoytoy!