EDITORYAL - Way nakat-onan

Dakong leksyon sa gobiyerno  ang nahitabo karong krisis sa lana sa Pilipinas, apan mga pagtulon-an unta nga dili na mahitabo pag-usab o bisan dili lang ingon ani kadako ang epekto sa nasud kun duna napuy sama ani nga krisis.

Dili na kini bag-o, kay nahitabo na kini kaniadto sa dekada 70 ug nasundan pa gyud sa Gulf War ug ang mga sunod-sunod nga kagubot didto sa Middle East nga nakaapektar sa transportasyon sa gisaligang petrolyo sa Pilipinas.

Ang gibuhat sa gobiyerno mao ang dinaliang pagpagawas og pundo para pang ayuda sa mga tawo, pero di tanan ang nakabenepisyo kay pinili ra ang gitunolan.

Kadtong sektor nga maoy kugihan manarbaho ug pirmeng kolektahan og buhis maoy wala hatagi og ayuda.

Ang resulta, kadto untang sektor sama sa mga middle class families nga igo-igo ra ang kita para makasugakod mabira paubos tungod sa krisis apan walay ayuda sa gobiyerno nga gitunol.

Usahay dili mabasol ang uban nga sawayon ang gobiyerno kay kadtong mga tapolan manarbaho man man hinuoy giuna sa pagtabang.

Sa samang paagi diha sa habig sa transportasyon, mitiyabaw sila sa kadako sa pagsaka sa presyo sa petrolyo ug hulgaon ang gobiyerno sa ilang transport strikes kay sayud silang ma-presyur ani ang mga naa sa kagamhanan, pero wala nila lantawa ang epekto ani sa mga working class ug sa publiko sa kinatibuk-an nga parehas raman unta nila nga naapektohan sa krisis.

Naa gyuy solusyon unta ani kung gitiman-an lang ang mga leksyon sa nangaging mga krisis ug gibuhatan daan og mga programa ug plano para dili ma-ingon ani.

Ang pinakauna gyung kinahanglang aksyonan sa mga magbabalaod mao ning pagbasura sa Oil Deregulation Law, pagpalit og balik sa gobiyerno sa Petron, pagpangunay og tukod og mga renewable energy facilities, ug pagpangita sa mga natural gas deposits ug ugmaron kini. Sa habig sa transportasyon, maghimo og public transport system nga ang gobiyerno maoy mo-operate sa tibuok Pilipinas ilabi na sa mga dagkong mga siyudad. Ang mga lider sa Pilipinas magbaton unta og hiyas sa pagpanagana ug panglantaw sa ugma para sa malungtarong solusyon sa matag problemang wala pa mahitabo apan posibleng mahitabo.