Bulawan nga kasingkasing misibaw taliwala sa krisis karon

Halos tanan presyo sa mga butang ang misaka tungod sa walay hunong nga pag-umento sa presyo sa produktong petrolyo nga nakamugna gyud og grabeng kadaut sa kinabuhi ug panginabuhi sa katawhan. Usa sa gikabalak-an sa mga tawo ilabi na kadtong adunay problema sa panglawas ang dako nga posibilidad nga mosaka ang balayronon sa mga hospital kay lagi usa man kini grabeng naapektohan karon sa mega fuel price hike kay tanan nilang gikinahanglan nagsalig man sa transportasyon.

Apan balit-ad ang gihimo sa Sugboanong pilantropo nga si Atty. Augusto Go kay inay magpaumento sa bayranan sa ilang mga tambalanan, ang UCMed ug St. Vincent, nakahukom siya nga mopatuman og hospital fee increase freeze o walay mahitabo nga umento sa bayranan sa mga pasyente sa ilang mga hospital. Kadtong mga walay ikabayad tungod sa kalisod mamahimong data datahan lang.

Dili pa ni mao tungod kay apil ang ilang mga tunghaan, gi-freeze usab nila ang gikatakda untang umento sa ilang tuition. Gikanselar sa UC ang pagpatuman sa tuition fee kay nasabtan sa management ang kahimtang sa ilang tinun-an nga anaa kasagaran sa lower middle income bracket. Gipaneguro sa tunghaan nga kong unsa ang tuition sa mga tinon-an karon magpabilin nga ingon ani hangtud maka-graduate sa bisan unsa nga kurso basta dili lang mahagbong sa grado.

Talagsaon ang gihimo ni Atty. Go kay sa tinuod lang apektado usab sila. Apan mas giuna niya ang kaayohan sa iyang isig ka tawo. Maayo kining himoong sumbanan sa uban nga mga negosyante nga dili lang ang kaugalingong interest ang gitan-aw kon dili ang mga tawo nga nahimong kabahin kong asa sila karon.

Sa natad sa edukasyon, matud niya nga prioridad kini niya isip iyang legasiya ang pag-umol sa kaalam sa ilang mga tinun-an. Kay tam-is matud pa pamation nga makita niya nga ang usa ka tinun-an nahimong nagmalamposon nga mobalik ug makig atubang kaniya nga magpasalamat sa kaayo nga nahimo niini sa ilang kinabuhi. Kong sa natad sa medical services, talagsaon usab ang iyang pagluag sa patakaran. Inay lisod lisoron mas gipili niya ang kaaghog ilabi na niadtong nagkinahanglan gyud og tabang.

Ang kaayo nga gipakita sa Sugboanong pilantropo dili angayan nga abusahan kay basin dunay mga tawo nga mopamulos sa higayon ug magpakarong-ingnon lang aron maka-avail sa kaayohan. Ayaw pud kay dili usa ka charitable institution ang kompanya niini sanglit dunay mga trabahante nga nagsalig sa income nila aron usab makapadayon sila sa ilang serbisyo.

Dili usab kini hangtud sa hangtud kay duna man usay limitasyon hangtud nga makabangon ang atong nasod gikan sa nasinati nga krisis karon, dili man diha diha dayon apan moabot ang panahon nga makab-ot ang gitinguhang pagbangon.

Unta manakod si Atty. Go ug himoon usab ang gihimo niini alang sa mga tawo nga nagkinahanglan og tabang karong panahona. Dinhi nato makita ang sidlak sa bulawan nga kasing kasing sa mga tawo sa panahon nga makasinati og kalisdanan. Saludo Atty. Go!