EDITORYAL — Domingo sa Pagkabanhaw

Karong adlawa gipaabot nga modagsa ang mga tawo sa nagkadaiyang mga beach ug mga mountain resorts para sa tradisyonal nga “Gisong” dungan sa Domingo sa Pagkabanhaw sa tinuohang Romano Katoliko.

Apan gawas sa mga magtutuo ug ilang mga pamilya, modagsa sab bisan dili mga Romano Katoliko tungod kay panahon man karon sa tingbakasyon dinhi sa Pilipinas ug gipaabot nga mangita sab sila og mga dapit para maka-relax.

Nahimo na kining pamaagi sa mga pamilya ug sa mga indibidwal nga makapahuway gikan sa presyur sa kinabuhi sa siyudad, sa trabaho, ug sa mga obligasyon bisan sulod lang sa pipila ka adlaw.

Apan ang mga otoridad mipahimangno sa publiko nga mag-amping gyud sa tanang oras sa ilang paglipay-lipay.  Niadto lang Biyernes Santo, nakatala na ang Philippine National Police og pito ka mga tawo nga nakalas tungod sa pagkalumos sa gikaligoan nilang lugar.

Para sa mga ginikanan, kinahanglang dili gyud pasagdan ang ilang mga anak ilabi na kadtong dili makamaong molanguy .

Ang kabaga sa mga tawo nga mangaligo, ilabi na sa mga pangpublikong baybayon o mga falls, suba ug uban pa, dili na mabantayan ang tanan ug anha usahay mahitabo ang insidente sa pagkalumos kay walay makatutok sa mga bata.

“Dili sab angay kalimtan nga ang Domingo sa Pagkabanhaw usa ka balaanong adlaw para sa tanang Kristiyano, kinahanglang mosimba kauban ang pamilya dungan sa pagpasalamat ug pagpaabot sa mga petisyon para sa gasa ug grasya  maong kinahanglan gihapon nga ipabilin ang ka solemni niini.”

Gawas pa niana, samtang tuod naay krisis karon dinhi sa nasud tungod sa kagubot didto sa Middle East, apektado lang ang mga Pilipino sa ekonomikanhong negatibong epekto niini.

Hinumdoman unta sa mga magtutuo karong adlawa ang panawagan ni Pope Leo XIV sa iyang Palm Sunday message nga iampo ang mga Kristiyano didto sa Middle East nga direktang nag-antus ug nangamatay karon tungod sa kagubot didto ug sa uban pang mga Kristiyano sa ubang bahin sa kalibotan.