EDITORYAL - Diskripsyon sa pagpakilimos

Nag-viral karon sa social media ang usa ka video sa pagsikop o paghipos sa mga sakop sa Cebu City Anti-Mendicancy Office ang lalaking nag-viral sab kaniadto sa social media tungod sa iyang “living statue” nga pose diha sa dalan Colon.

Ang maong lalaki nga naila nga si Marvin Lastimoso, nailhan sa unang pose niya nga “Blue Man” ug “Human Statue of Colon.” Ang iyang gihimo matawag og “art” sa uban ug gani daghan ang nahimuot sa iya nga magpa-picture o magpa selfie sa iyaha.

Tungod sa iyang pag-agwanta og pila ka minutos nga dili maglihok-lihok dunay mga tawong mohatag niya og kwarta diha sa iyang tiilan. Dili ikalimod nga nakakwarta gyud siya ani iyang talento. Dili baya lalim ang magbarug nga dili maglihok.

Pero kung para sa uban usa kini ka art ug daghan ang nahimuot, sa mata sa Cebu City Anti-Mendicancy Office usa kini ka matang sa pagpakilimos.

Parehas anang manaygon, usa man sab na ka matang sa art, pero gidili sab kini kun diha buhaton sa sulod sa mga pasaheroan kay peligro.

Karon ang pangutana, kana diay mga relihiyosong pundok nga magwali-wali diha sa dalan Colon nga magdala dala og sibot ug mangayo og donasyon, dili ba na matawag nga pagpakilimos?

Kanang mga buskers nga mopwesto sa mga eskina unya mokanta og mga nindot nga awit, hatagan man na sila og kwarta sa mga tawong lumalabay, bawal sab na?

Kung bawal na kay makonsiderar nga usa ka matang sa pagpakilimos, nganong wala man na sila pangdakpa sama sa gibuhat ngadto sa Blue Man?Kung gibadlong na sila sa kay bawal, nganong wala man badlongan si Blue Man, gidakop man gyud siya? Tingali naay gihimo si Blue Man nganong siya gidakop. Basin og nagpakilimos gyud siya.

Pero, angay gyud klaruhon ni kay lahi man tingali ang pagpakilimos itandi sa mga nagpakita og talento unya tunolan og sensilyo. Ang pagtunol sa sensilyo ngadto sa mga artist, dili man na matawag nga limos.

 Maayo tingaling klaruhon ni sa mga konsehal sa dakbayan ang diskripsyon sa ilang “pagpakilimos.”