Unsay mahitabo kun di mabayran ang loan sa bangko

Dear Atty. Divine,

Ang akong papa sa buhi pa, aduna loan sa bangko ug ang among umahan ang iyang gihimong collateral. Namatay na ang akong papa ug wa pa niya ma-impas sa pagbayad ang bangko sa iyang huwam. Wa sab namo mabayri ang balance kay ang among income igo ra sab sa among inadlaw nga panginahanglan. Ang akong pangutana kun unsay mahimo kun di gyud namo mabayran ang maong loan ni papa sa bangko? Daghan kaayong salamat. —Roland

Dear Roland,

Bisan kun patay na ang nag-loan, obligado gihapon kining bayran ang maong utang pinaagi sa iyang estate o kabilin nga kabtangan. Kun dili na ninyo ma-settle ang iyang loan sa bangko ug moabot na ang term niini nga dapat na unta niyang i-fully paid, hayan embarguhon o i-foreclosed kini sa bangko ang farm land sa imong papa nga gihimo niyang collateral. Apan kun gusto  gyud mo nga masayud kun unsay status sa utang sa imong papa ug kun kanus-a kini dapat ifully-paid, pwede ninyo i-check sa bank aron inyong madesisyunan kun unsay sunod ninyong buhaton sa property. Lain ninyong option, inyong ibaligya ang property aron inyong bayran ang bangko apan kinahanglan nga inyong pahibaw-on ang bangko labot sa inyong plano nga pagbaligya aron ibayad sa remaining balance sa huwam sa imong papa. Thank you and God Bless. —Atty. Divine

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.