Pagpamalandong matag Domingo

Ang Domingo sa Lukay sinugdanan man sa atong pagsaulog sa Semana Santa. Ning higayona nahimong dasig ang matag usa nga mopa bendita sa ilang lukay. Kasagaran atong ipamutang kining maong mga lukay nga atong giporma og krus sa tagsa tagsa nato ka mga ganghaan. Pahinumdom sa atong pagka Kristiyanos kay lagi dili man kita mamahimong tawgon nga mga kristiyanos kun wala ang Krus.

Sa laing bahin, adunay transistion. Ang atong liturhiya sa sinugdanan karong Dominggoha. Gikan sa malipayong singgit og: Hosana sa Anak ni David! Ang Hari sa Israel Daygon ang Nagaanhi sa Ngalan sa Ginoo! Hosana! Hosana! Sa Kahitas-an!” ngadto sa makusganon ug pintas nga siyaok: “Ilansang siya sa Krus! Ilansang Siya sa Krus! Ug tuod man ang maong singgit sa pagsilot nagmalampuson.

Sa atong panaw ning laing hugna sa Semana Santa. Kining maong panaw nagdasig kanato sa paghimo og personal introspection sa atong kaugalingong relasyon uban ni Kristo Jesus. Ang Hwebes Santo nagpaghat kanato sa pagpalawom sa tinud-anay nga kahulogan sa atong pagka dinihogan ingon hari.

Ang pangalagad sa tinud-anay gayud mao man ang atong tawag. Pangalagad nga pinasikad sa paghigugma. Kay diha lamang sa paghigugma kita mailhan nga mga tinun-an ni Jesus ang Hari nga nialagad bisan sa labing ubos sa tanang mga kaigsuonan. Ang Biyernes Santo nipahinumdom nga bisan unsaon dili gyud mahimong ibulag ang krus gikan sa atong kinabuhi.

Ang Sabado Santo labina gyud ang Easter Vigil nipahigmata kanato nga ang Kahayag nga iya sa Dios dili mahimong buntogon sa kangitngit. Ang Dominggo sa Pagkabanhaw mao man ang nagdasig kanato nga dili angay nga mahadlok sa kamatayon sanglit ang kamatayon mao man ang pagkahimugso nato padulong sa kinabuhing walay katapusan.

Sa atong pagsugod ning panahon sa Semana Santa dili kita angay nga ma focus lang sa mga kalihukan sama sa visita iglesia ug uban pa. Hinunoa angayan natong ipunting ang atong kaugalingon ug naunsa na kaha ang atong relasyon ngadto sa Dios nga atong Magbubuhat.

Ang atong Ginoo gidawat uban sa kalipay apan gihukman sa tumang kapintas. Ingon ini usab ang atong kahimtang. Dili tanang pahiyom ug palakpak pagaisipon nga pag-uyon ang uban kanila usa man ka dakong lit-ag.