EDITORYAL - Balikbayan boxes nga nangatanggong

Kaliboang mga overseas Filipino workers ug ilang mga pamilya ang nangalipay karon nga nadawat na gyud nila ang pila ka bulan na nilang gipaabot nga mga gipadalang Balikbayan Boxes nga nangatanggong sa mga nagkadaiyang pantalan sa tibuok Pilipinas.

Matud pa sa report, moabot og 50,000 kapin nga mga balikbayan boxes ang nangatanggong sa mga adwana sa tibuok nasud tungod kay kini gipang-abandonar sa mga freight forwarders kay galikay nga makabayad sa buhis diha sa Bureau of Customs.

Kaning Balikabayan Boxes tinigoman gyud ni ug gipatulo-an og singot sa mga OFWs nga nanarbaho sa abroad para mapadala sa ilang mga pamilya dinhi.

Ang uban gani ani, binuwan ang gidugayon ayha napuno ug ayha pa nila gipadala, apan diay to pag-abot dinhi nangatanggong lang sa mga pantalan kay ang mga forwarders misibat. Ang uban tingaling mga gipadala mga pagkaon nga nanga-expire nalang.

Pero si Presidente Ferdinand Marcos Jr. nipagawas og direktiba sa Department of Finance sa pagpagawas og sobra P300 milyones nga pundo aron itapal sa balayrunong buhis sa mga balikbayan boxes ngadto sa Bureau of Customs.

Tungod sa maong programa hinayhinay nga napadala na ngadto sa mga pamilya ang mga Balikbayan Boxes, gani ang uban sa nidawat mao ang mismong OFW nga nakauli nalang diri ayha pa nadawat ang ilang gipadala pipila ka bulan na ang nakalabay.

Karon ang pangutana, kang kinsa man ning sayup? Sa BOC ba o sa gobiyerno mismo? Pwede ning ibasol sa  mga ahensiya sa gobiyerno mismo nga gitahasan ani tungod sa ilang kakulang ug dugay kaayong aksyon.

Makatarunganon lamang nga pasakaan og kaso kadtong mga kompanya sa freight forwarders nga ni-abandonar aning mga Balikabayan Boxes aron dili na mausab ug makabayad sila sa ilang gidaganan nga buhis.