EDITORYAL - CBRT nakasulbad ba sa traffic?

Naablihan na ang pasiunang operasyon sa Cebu Bus Rapid Transit diha sa dalan Osmeña Blvd. padung sa Cebu South Bus Terminal. Apan pipila palang ka adlaw gikan sa operasyon naa gyud dayuy nakitang problema.

Problema nga maoy rason nganong gitukod kining CBRT , ang traffic. Mao nga sa orihinal nga plano ang tungatungang bahin sa dalan ekslusibo kini para sa mga bus nga magdagan, dili kini mohunong para magpakanaog ug mopasakay og pasahero kung dili sa bust stops nga gihimo.

Tinuod gyud, pila lang ka minutos abot dayun ang mga nakasakay sa mga bus, pero dako kaayo og problema sa isi’g ka kilid sa maong dalan kay didto naghuot ang sagol sagol nga mga tradisyonal nga PUJs, modern PUJs, mga pribadong sakyanan ug mga motor ug uban pa.

Ang pangutana, nasolusyonan ba gyud ang problema? Wala.

Mao nga wala pay usa ka semana gikan sa pag-abli sa CBRT, giusab ang orihinal nga plano. Dili na ekslusibong para sa mga bus sa CBRT ang tungatungang bahin sa karsada kay tanang pasaheroan moderno man o kagang-kagang anha na sab sila padaganon.

Mosubay na sila sa rota sa CBRT ug sama sa mga bus niini, dili na makapataka og pasakay ug pakanaog ang mga MPUJ ug traditional PUJs og pasahero. Kinahanglang sa mga terminal sab sila sama sa bus.

Ang mga tawo miisa ang kilay tungod sa maong bag-ong sistema. Ang bus sa CBRT imbes nga mopaspas ang biyahe karon malangan na kay nakiglumba naman sila sa mga pasaheroan.

Unya kadtong mga pasaherong sakay sa mga traditional PUJs ug Modern PUJs, kinahanglang molakaw gikan sa terminal padung sa ilang adtuon. Hinuon dili kini dapat ikasuko, kay nabuhat man kini sa ubang mga nasud. Disiplina lang ang kinahanglan.

Pero naay positibong bunga ang maong kausaban, niluag ang traffic sa isi’g ka kilid sa Osmeña Blvd.kay mga pribadong sakyanan nalang man maoy moagi.

Kaniadto pa duna nay mga wala makauyon aning pagtukod sa CBRT tungod kay gagmay ang mga dalan dinhi ug kung kuhaan pa gyud para himuong ekslusibong lane, samot gyud og kahuot ang traffic.