Bus Rapid Transit

Gisubhan na ang BRT o Bus Rapid Transit niadtong miaging Biyernes. Apan human kini nasubhan

gipahibawo ni Cebu City Mayor Nestor Archival nga iyang paagion sa designated BRT lane ang uban nga mga sakyanan.

Ang BRT mao ang sulbad sa lokal nga kagamhanan sa dakbayan sa Sugbo sa suliran sa trapiko. Bilyones nga salapi ang giutang sa lokal ug nasudnong kagamhanan alang niining maong proyekto nga gilauman nga makasulbad sa suliran sa trapiko sa dakbayan sa Sugbo.

Apan sa pagsubo nakita nga wala masulbad ang suliran sa trapiko. Tinuod, nakita nga sa BRT designated lane wala gyoy trapik. Hawan kaayo ang dalan, gani puwede ka nga mag skating tungod sa kahawan. Apan sa gawas nga bahin sa designated BRT lane, bumper to bumper ug hapit na magsungagay ang matag dulong sa mga sakyanan nga naghuot sa ka-traffik.

Gawas niini, ang Bus Rapid Transit dili pa rapid ang transit kay wala pay bus. May bus man tuod nga nagdagan apan pila pa lang ka buok.

* * *

Padayon ang pagsulbong sa presyo sa mga produktong petrolyo nga milagpas na sa usa ka gatos ang matag litro niini. Wala pud magpalupig sa pagsulbong ang presyo sa bugas nga ang uban milapas na sa tag P70 ang kilo.

Ang mga motorista sa miaging mga adlaw naglinya sa mga gasolinahan aron dili maabtan sa tag P15-P24 matag litro nga umento sa produktong petrolyo. Giklaro ni Department of Energy Secretary Sharon Garin nga walay krisis sa lana. Wala tinuod krisis sa lana kay mokabat pa sa 60 kaadlaw ang pundo nga lana sa mga kompanya sa lana. Ang pagsulbong sa presyo sa lana dili tungod sa krisis sa lana kun dili mugna kini sa panagkonsabo sa administrasyong Bongbong Marcos ug mga kompanya sa lana sa pagpasukamod kanato nga nagsusapinday na sa kabugat ug ka mahal sa bugas ug ubang palaliton. Apan bisan pa man sa kapait sa sitwasyon ang mga nagbabalaud nakatutok ra sa pag impeach ni VP Sara Duterte nga seguro sa ila ang pag impeach sa bise presidente mao ang sulbad sa kalisod.