Wala'y buying, panic ra'y nahibilin

Giawhag sa presidente sa Philippine Amalgamated Supermarkets Association nga si Steven Cua, ang publiko nga dili lang mag-panic buying taliwala sa kahadlok nga mosaka ang presyo sa mga grocery items aron mahimong magpabilin kini sa kasamtangan’g presyo.  Ang panic buying kinaiya sa tawo sa panahon nga adunay krisis.  Apan morag haum ra ang panawagan ni Cua ngadto sa mga adunahan.  Ang kabos dili gayod mapasanginlan nga mag-panic buying.  Mao kana’y giingon nga, “Alang sa mga kabos, wala gyu’y buying nga mahitabo, hinonoa, pulos panic ra ang nahibilin.”  Muleeng!

Ipatuo lang

Gisalindot sa Malacañang ang panawagan sa pundok sa mga mamumuo alang sa pagdeklarar og nasudnong emerhensya ingon man ang pag-takeover na sa kagamhanan sa patigayon sa lana uban ang pasalig nga kontrolado pa sa gobyerno ang sitwasyon. Puno sa pagpaka-aron ingnon ang pamahayag sa Malacañang kay bisan gani ang mga adunahan nga nasud mitiyabaw na man sa sitwasyon sa kanihit ug kamahal sa gasolina karon.  Kining pamakak sa gobyerno, nahasubay lang sa sugyot nga, “Ipatuo lang nga kontrolado nimo ang sitwasyon ug ang katawhan magtoo ra usab nga kontrolado gayod nimo kini.”  Madahaan!

Mas dako ang kadaot

Mopahigayon gihapon og pagdungog ang Justice Committee sa kongreso kabahin sa impeachment proceedings ni Bise Presidente Sara Duterte sa dili pa mo-adjourn ang kamara.  Atong makita nga sibot kaayo ang kongreso nga ma-impeach ang bise presidente.  Nagtoo tingale ang kongreso nga gikahinangop sa katawhan kini’ng pag-una nila sa impeachment inay sa pagpangita’g alibyo sa kalisod sa katawhan labi na sa krisis tungod sa gubat sa Iran.  Haum gyud kaayo ang panahom nga, “Dako hinoon ang kadaot nga mahimo sa gobyerno kon mosuway kini nga mahimong mapuslanon sa katawhan.” Fezteleern!

Sensilyo na lang

Gi-aprobahan na sa gobyerno ang pagpausbaw sa plitehan sa mga de-pasaherong sakyanan luyo sa padayon’g pagsaka sa presyo sa gasolina.  Gisaway sa mga driver ug commuters ang maong pag-usbaw sa plitehan kay matud pa nila wala niini matubag sa hingpit ang suliran, hinonoa naghatag lang kini og dugang palas-onon sa inadlaw’ng galastohan.  Sugod karong semanaha, makakita na kita’g karatula sa mga jeep nga nag-ingon, “Minimum Fear” (inay fare).  Mausab na pud unya ang panahom sa mga driver.  Inay moingon sila nga “Sensilyo lang sa syong kabuntagon, moingon na lang sila nga ‘sensilyo na lang intawon ang nasobra karon.”  Saoonz!

Dili makabasa

Segun sa kasayoran nga gibutyag sa Second Congressional Commission on Education (Edcom 2), daghan ang mga tinun-an sa mga tulonghaan sa dagkong syudad sa Sugbo ang naglisod gihapon sa pagbasa.  Giawhag sa Edcom ang mga lokal nga lider nga mohimo’g mga lakang aron mahatagan og pagtagad kini’ng gitawag nila nga “historic crisis” sa mga tulonghaan.  Dako ug kuyanap kining maong suliran sa atong kabataan nga nasamotan pa gayod sa suliran sa nutrisyon sa kabataan.   Makapahinumdum sa bata nga gipabasa sa advertisement sa kalendaryo. Inay “Bioderm” ang iyang basahon ug litokon, gitotokan lang niini ang hulagway sa kalendaryo, dayon ingon nga “Broncho Rub”.  Pagkatoytoy!