EDITORYAL — Sitwasyon sa ME gigamit nga Propaganda

Nag-anam anam na og pangabot dinhi sa Pilipinas ang mga Filipinong nagtrabaho sa nagkalain-laing mga nasud didto sa Middle East nga gustong makalikay sa nagkagrabeng tensyon didto dala sa pagatake sa Amerika ug Israel sa nasud sa Iran.

Nakaparalisar sab kini sa supply sa petrolyo gikan sa maong mga nasud nga nakaapektar na karon tibuok kalibotan ilabi na dinhi sa Pilipinas. Tungod sa kagubot didto daghang mga naipit nga mga overseas Filipino workers sa ME.

Dinhi sa ato, pwerteng daghana sa mga misaway sa administrasyong Marcos tungod sa matud pa kahinay sa aksyon aron makauli dinhi sa nasud ang mga OFWs.

Subo kaayo nga gihimo kini karong instrumento para sa politikanhong propaganda sa pipila ka mga vloggers tungod sa umaabot nga 2028 elections.

Wala nila hisguti sa ilang mga vlogs nga mismo ang mga gobiyerno sa mga apektadong mga nasud maoy nagpasira sa ilang kahanginan didto  ilabi na sa unang semana sa kagubot, daghang mga airports ang gisirado tungod sa padayung pagpamomba sa Iran.

Basta ang ilaha lang nga ipagawas nga walay gihimo ang gobiyerno para sa mga OFWs , lisangon ang mga pamilya dinhi para masuko sa gobiyerno, tipikal nga propaganda.

Apan sa pagdagan sa mga adlaw, duna nay mga nakauli balik sa Pilipinas pinaagi sa chartered flights diha gikan sa mas luwas nga mga tugpahanan sama sa Oman ug sa Egypt.

 Sa pagsugod palang sa giyera duna nay 1,400 ka mga Pilipino didto nga mipadayag nga gustong mouli, apan wala dayun sila makuha tungod kay gisirad-an ang mga kahanginan didto.

Apan sobra 1,600 ka Filipino na ang nakauli apil ani ang 1,022 OFWs ug 293 nila ka dependents base sa uwahing talaan niadtong Marso 14, 2026.

Sa kapin dos milyones ka OFWs ang naa karon didto sa Middle East, wala gani kaabot og usa ka porsiyento ang gustong mouli.

Dili ikalimod, gikan pa sa dekada 70 hangtud karon daghang mga Filipino mas gustohong magtrabaho sa abroad nungka dinhi bisan kinsa pay presidente.