Dakong problema

Tinuod, way gasto ang kagamhanan sa Cebu City niining pagpatuman og Bus Rapid Transit (BRT) sa pipila ka mga karsada dinhi sa siyudad, apan dili kini sulbad sa grabeng problema sa trapiko.

Hinuon, imbes masulbad ang problema sa kahuot sa mga sakyanan, mosamot nga masinati nato ang problema kon ipugos gyud pagpatuman nga ang BRT pabiyaheon na subay sa Phase 2 nga mao Escario Street nga gamay kaayong karsada.

Ipasabot nako pag-ayo nga suporta ko nga ipatuman ang BRT dinhi sa Cebu City kon giandam pa unta daan sa atong mga opisyal ang mga karsada nga anha paagion ang mga bus, sama pananglit sa pagpalapad sa karsada.

Tan-awa ra gud ninyo ang Osmeña Boulevard nga lapad man gani kanang karsadaha, 6 lanes road, kun 3 lanes sa usa ka direksyon, pero kay giibanan man og exclusive lane nga maoy agian sa BRT, gamay na lang ang nahibilin nga anha moagi ang ubang sakyanan.

Kon ipamugos gyud nga ang BRT pabiyaheon na subay sa Escario Street nga upat lang ka lanes, duha sa matag direksiyon, unsa man kaha ang sitwasyon sa traffic nga karon lang gani pwerte man nga huota sa mga sakyanan nga moagi diha?

Maayo ra ba kaayong moingon kining mga tigpasiugda sa BRT nga duha lang ka lanes ang gamiton, apan sa aktwal na subra diay sigun sa makita nato sa mga nahuman na nga BRT exclusives lanes.

Pun-an pa sa ibutang nila nga BRT stations nga mokaon gyud og luna sa karsada.

Napanglantawan nako nga ang BRT sa Cebu City mahisama sa BRT didto sa ubang kanasuran nga imbes makasulbad sa trapiko, misamot na hinuon ang problema ug gikanselar na lang.

Suma’a ug unsay nahitabo sa BRT didto sa Hanoi, Vietnam; sa Delhi, India; sa Lagos, Nigeria; sa Lima, Peru, ug didto sa Bangkok, Thailand, ug daghan pa nga mga nasud.

Dunay budget nga gitagana aron pagbayad sa Road Right of Way nga gamiton aron mapalapdan ang karsada, apan unsaon nga sa kadughay na niining maong proyekto wa man gyud malihok.

Sa mga nasud nga atong gihisgotan ang usa sa mga problema nga wa magmalampuson ang BRT project nila kay ang mga karsada wa maandam, ug hagip-ot kaayo.

Ang General Maxilom Avenue maoy agianan sa mga sakyanan gikan sa Fuente Osmeña nga mopaingon sa Mabolo ug sa North Reclamation, ug ang Escario Street sa mga sakyanan paingon sa Lahug ug Mabolo.

Kining mga karsadaha pwerteng huota sa mga sakyanan pagka karon, unya pagamyan pa hinoon ang karsada alang sa BRT? Hangtud karon ang mga tinugyanan nato sa trapiko wa pay plano kabahin niini.