Mahigalaong bakakon
Nailad na ta ni Presidente Ferdinand Marcos Jr. sa iyang saad nga P20 sa kilo sa bugas humay. Iyang economic managers nipasidaan nga matuman lang kon kanselahon ang ubang mga programa sa gobyerno aron kabuboan og binilyon ka pesos nga subsidy ang bugas humay.
Pero gipatuo gihapon ta nga duna nay P20 nga bugas humay sa tibuok nasud. Bahala na kon walay klaro asa kapalit ug kon makaon ba og tawo ang baligya. Timan-i, nagsunod lang sa tambag sa iyang amahan: Balikbalikon ang bakak hangtod kapoyan na sila paglalis nimo.
* * *
Nailad na sab ta ni Marcos Jr. sa iyang pasalig nga inihap na lang ang mga adlaw sa rice cartel ug sa hoarders ug smugglers sa mga produkto sa agrikultura. Wala pay gubat sa Iran, nimahal nang bugas humay bisan sa garantiya sa Department of Agriculture nga magpabiling ubos ang presyo kay dunay igong suplay.
Ambot tungod ba sa mahigalaon nga sinultihan, kanihit og pamalikas ug panginsulto, o tungod sa ka walay uwaw nga mobalikbalik sa mga bakak, naglaom lang gihapon ta nga naningkamot gyod siya pagtuman sa saad.
* * *
Bisan si kanhi Presidente Rodrigo Duterte, nga gituohang mas maayong mangilad kay niya (na-presidente gud sa 2016 tungod sa pasalig nga sulbaron ang ilegal drugas sulod lang sa tulo ka buwan), nakumbinser sa iyang saad nga dili mahitabong i-surender sa International Criminal Court.
Ambot nituo ba si Duterte nga bangag si Marcos Jr., nga tungod sa cocaine wala na sa tarung nga panghunahuna, maayong pagka-syut sa buyot. Nagkanihit ang kahigayonan nga makagawas nga buhi sa prisohan.
* * *
Lisod tuohan pero tinuod: Nailad na sab tang Marcos Jr. sa pasalig nga imbestigahon ang flood control scandal ug prisuhon ang labing dagkong kawatan. Walo ka buwan human sa iyang “Mahiya naman kayo” nga State of the Nation Address, wala pay dagkong isda nga nakiha ug napriso.
Ug kon duna pay naglaom nga nakatsamba siya pagsulti sa tinuod, pormal nang gipahibawo ang pagbungkag karong Marso 31 sa Independent Commission for Infrastructure, nga iyang gisugo paghimo sa labing komprehensibong imbestigasyon sa labing dakong kawat sa atong panahon. Igo lang tang manghupaw. Hangtod sa sunod niyang mahigalaon nga pamakak.
* * *
- Latest
