Suroy-Suroy ipribado

Insakto ang lakang nga gibuhat sa administrasyon ni Cebu Governor Pamela Baricuatro pagdelegar sa Suroy-Suroy Sugbo, ang flagship tourism program sa probinsiya, ngadto na sa pribadong sektor.

Kini aron nga mas molambo pa kini ug mamahimong nag-unang programa sa turismo sa lalawigan nga nag-generate og dakong revenue alang sa mga Sugboanon. Nga angay usab nga sundon sa ubang probinsya sa nasud.

Wala ko moingon nga nagmika ang Suroy-Suroy Sugbo panahon sa nangaging administrasyon. Gani, angay kini nga pasalamatan tungod sa pag-umol sa ingon niini nga klase sa programa sa turismo.

Dili ikalimod nga, sulod sa pipila ka tuig, naandan na usab kining Suroy-Suroy sa Sugbo nga mohakot og mga turista, ilabina kadtong mga balikbayan, kinsa gustong moduaw sa mga maanindot nga lugar sa Sugbo.

Gani, nagkadako na kining maong programa ug nahimo nang krusyal nga institusyon nga nagkupot og importante nga papel matag tuig pag-promote sa sektor sa turismo sa lalawigan ngadto sa kalibotan.

Apan, sa akong nakita, dako pa og kakulangon ang Suroy-Suroy Sugbo sa natad sa pagdani og dugang turista. Kay matag tuig, akong nabantayan nga mao-mao ra gayud ang gidaghanon sa mga bisita nga manambong.

Asa nga aspeto nga nagkulang ang maong programa? Ambot wala ko masayod. Siguro mora’g limitado ang pagdumala sa lokal nga pangagamhanan sa lalawigan sa maong programa.

Apan panahon na tingali nga ang pribadong sektor maoy mokupot sa Suroy-Suroy Sugbo kon gusto lamang gayud kita og tinud-anay nga kalamboan niini. Mao nang insakto lamang ang desisyon ni Gobernadora Baricuatro.