EDITORYAL — Pakyas ang Fishery Law?

Naghiusa karon ang Bureau of Fisheries and Aquatic Resources -7 ug ang Philippine Air Force aron pangusgan ang kampanya batok illegal fishing sa rehiyon aron pagsiguro sa food security dili lang dinhi kondili tibuok nasud. Ubos sa The Philippine Fishery Law o Republic Act No. 8550 (The Philippine Fisheries Code of 1998) nga giamendahan sa RA 10654, gi regulate niini ang pagdumala, konserbasyon ug kalamboan sa tanang aquatic resources sa nasud.

Gihatagan og gibug-aton sa mga programa para niini ang malungtaron nga  food security sa nasud. Apil sab ang ekslusibong katungod sa mga Pilipino aning mga aquatic resources apan silotan kadtong moguba niini pinaagi sa illegal fishing.

Nindot ang mga probisyon aning balaora, apan subo kaayo kay naa gihapoy mga mapahimuslanong mananagat ug mga negosyanteng nagpaluyo sa illegal fishing.  Ubos sa maong balaod, higpit nga gidili ang pagpanagat sa mga commercial fishing boats nga may gibug-aton nga tulo ka tonelada sulod sa 15 kilometrong municipal waters sa mga LGUs.

Dunay daghang nangadakpan apan ang local fishery ordinance ra maoy ipasaka nga gamay ra og multa maong dili sila motagam.

Gawas pa niana, mismo ang mga LGUs pakyas sa pagpalambo sa ilang lokal nga mga mananagat. Duna silay lokal nga ordinansa ug regulasyon apan kutob ra sa papel.  Way nagbantay kun nigamit ba sila og pinong pukot, kuskos o cyanide, sinsuro, pagpangukab ang kabatohan aron manguha og saang ug kinhason, paggamit og dinamita.

Pun-an pa ang pag-upaw sa mga mangrove forest, polusyon sa basurang plastic , kemikal gikan sa mga pabrika ug uban pa. Nakatampo ni  sa pagkaguba sa ilang local marine ecosystem, maong ang uban adto nalang managat sa laing lugar.

Kaning unregistered, unregulated ug unreported fishing activities usa sa mga hinungdan sa pagkubos sa fish stocks sa nasud. Matud pa sa BFAR-7 dako kaayo ang pagkunhod sa nakuhang isda sa miaging dekada nga miabot og 170,000 metric tons kay karon 61,000 metric tons nalang. Sa ato pa bisan sa pag-amendar sa Fishery Law sa tuyo nga mas mahatagan og ngipon ang balaod batok illegal fishing, wala diay kini makatabang.