Wa giapil sa bahin ang ubang Heir

Dear Atty. Divine,

Ang kabilin sa among apuhan nga property gibahin-bahin na sa mga heirs nga wa giapil ang akong inahan. Among nahibaw-an nga nagpahimo og Extrajudicial Partition ang mga igsuon sa akong mama nga wa siya giapil sa pagpapirma. Inay lima silang magbahin sa property, upat nalang kay wa man nila giapil ang akong inahan. Ang akong pangutana, unsay angayan namong buhaton aron maapil sa bahin ang among inahan?Daghang salamat. —Linda

* * *

Dear Linda,

Ang unang buhaton sa imong inahan mao ang pagpakigsulti sa iyang mga igsuon ug pagsuta kun tinuod ba nga adunay Extrajudicial Partition nga ilang gipirmahan nga wa siya giapil. Kun makompirmar kini sa imong mama, mamahimo siyang mo-demand nga ipausab ang maong dokumento ug ilakip siya sa pagbahin sa property isip usa sa mga compulsory heirs. Kun dili kini nila usbon,  mamahimo siyang mopasaka og reklamo sa barangay diin mahimutang ang property ug iyang ireklamo ang iyang mga igsuon nga nag exclude kaniya sa pagbahin-bahin sa kabilin. Kun di mo ma-settle sa barangay, mamahimong modangop sa korte ang imong inahan pinaagi sa pagpasaka og kaso aron madeklarar nga invalid ang Extrajudicial Partition nga una nilang gipormahan ug mo demand siya og judicial partition aron maapil tanang heirs sa pagbahin. Thank you and God bless. —Atty. Divine

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.