Gustong demolison ang ilang gipuy-an

Dear Atty. Divine,

Nagpuyo mi sa yuta sa gobiyerno sud na sa halos 50 ka tuig gikan pa sa akong mga ginikanan. Apan nakadungog mi nga idemolish or hawanan na sa gobiyerno ang among area ug ipaguba ang among mga pinuy-anan. Tungod niini, nabalaka gyud mi attorney kun asa na man lang unya mi puyo kun ila ming papahawaon aning maong lugar. Ang among panginabuhi-an nagtinda lang sa kilid sa kalsada busa di gyud mi maka afford nga mopalit og yuta aron maoy among tukuran sa among pinuy-anan. Ang akong pangutana kun mapugos ba kami sa pagpapahawa dinhi sa among gipuy-an karon sud na sa daghang katuigan? Daghang salamat. -- Lina

* * *

Dear Lina,

Basi sa balaod, ang mga informal settlers or squatters walay katungod nga makapanag-iya sa yuta nga ilang gipuy-an bisan pa kun ila kining gi-occupy sud na sa daghang katuigan. Kini tungod kay ang tag-iya sa yuta mao man gyuy adunay katungod niini.  Busa kun gamiton na sa tag-iya ang yuta nga inyong gipuy-an wa gyud moy mahimo niini kun kuhaon na kini sa gobiyerno. Hinuon adunay balaod nga nagprotihir sa mga informal settlers nga mao ang Republic Act No. 7279 o Urban Development and Housing Act of 1992 or UDHA law. Basi sa maong balaod, entitled ang mga squatters sa due process, humane treatment, og relocation/ housing assistance.  Buot ipasabot nga dili mo papahawaon diha-diha ug kinahanglan nga hatagan mo og notice aron sa pagbakante sa luna. Kun dili gihapon mo mo-vacate sa property mamahimo silang modangop sa korte aron ang korte na ang momando sa pag-vacate luna. Mas maayo nga kun padad-an mo og notice to vacate, makig negotiate mo sa gobiyerno aron kahatagan mo og relocation site nga inyong kabalhinan. Thank you and God Bless. -- Atty. Divine

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo