Pamakak o tinuod

Namahayag si Senador Francis “Chiz” Escudero nga ang housing data sa Department of Human Settlements and Urban Development (DHSUD) gi-maniobra aron makorehi-an ang backlogs sa housing program.  Gikumpara ni Escudero ang datos karon nga adunay 2.2 million backlogs ang ahensiya sa nahauna’ng datos nga adunay 6.5 million backlogs.  Maingon nato nga “lipat-lipat” ang duwa sa DHSUD.  Bisan gani mismo si Presidente Marcos, nahiapil niining maong paghinambog sa ilang housing project accomplishment.  Apan pasabot pa sa akong amigo, “Wala ma’y paghinambog nga gihimo ang gobyerno.  Duha ra ang paingnan sa ilang taho: namakak o nagsulti sa tinuod.”  Muleeng!

Kahinam sa gahum

Gikasuko pag-ayo ni Presidente Marcos ang gihimong pagmaltrato ug pagsalikway sa mga OFW, sa usa ka Migrant Workers Office (MWO) employee sa Bahrain.  Gipa-imbestigahan gilayon sa presidente ang maong panghitabo nga nakuhaan pa gayod og video footage.  Daghan na kining maong panghitabo diin ang mga anaa sa gobyerno moabusar sa ilang katungdanan.  Yano ra kaayo nilang gikalimtan nga ang katawhan maoy nagsweldo kanila pinaagi sa ilang buhis.  Haum kaayo ang panultihon nga, “Ang kahinam sa gahum natisok na sa kasingkasing ug hunahuna sa tawo ug kinaiya na usab niya nga abusohan kini kon masakmit na kining maong gahum.”  Fezteleern!

Bantayan ang presyo

Nabahin ang konseho sa dakbayan sa Sugbo kon unsaon pagtubag sa kagamhanan niining padayon nga pagsaka sa presyo sa bugas.  Adunay pangutana kon ang pagmonitor sa presyo maka-tubag ba sa maong pagsaka sa presyo.  Base sa atong kasinatian, walay kaayohan sa katawhan ang price monitoring sa gobiyerno.  Matud pa sa mga kritiko, “Kugi kaayo mopahigayon sa price monitoring apan ang nahitabo, sama ra’g naghinan-aw ang gobyerno sa nagdinasmagay nga sakyanan ug girecord lang kon unsay gikusgon sa ilang dagan.  Resulta, pulos ra pagbantay apan walay pagkunhod sa presyo.”  Madahaan!

Ibalik ang swerte

Taliwala sa reklamo sa publiko kabahin sa kabaho sa basura nga gidan-ok sa South Road Properties (SRP), gimando ni Cebu City Mayor Nestor Archival nga kuhaon gilayon kini pagbalik.  Makapahinumdom kining gibuhat nga paghabwa og balik sa basura sa SRP sa commercial sa TV diin gisaway sa agalon ang iyang katabang ngano nga nanilhig kini nga gabii na man.  Dugang pa sa agalon, molayas usab ang swerte sa iyang pagpanilhig.  Tungod niini, gibalik sa katabang pagsilhig padung sa sulod sa balay ang basura dungan ang pag-ingon nga, “Aw, ibalik ang swerte.”  Ateer!

Kusog mohangyo

Gi-ilisan na karon og bag-ong ngalan ang tourim ug trade expo sa Cebu gikan sa daan nga R’Cebu ngadto sa “Our Cebu”.  Tuyo gihapon sa maong expo ang pag-showcase sa mga lumad nga produkto sa kalungsoran apan ni’ng higayona ilakip na usab sa showcase ang mga tourism destinations ug accommodation facilities.  Maanindot kini nga kahigayonan alang sa mga tigbuhat og mga produkto.  Apan may kwidawo ang akong amigo niini kay matud pa niya, “Ang problema lang usahay sa mga customer kay kusog mohangyo sa produkto sa ubos nga presyo nga dili na gani makalikwa ang manindahay.”  Pagkatoytoy!