Misa sa Basilica

Sa akong pagtagik ning maong lindog nangandam ko alang sa Santos nga Misa Basilica Minore del Sto. Ikaduha na nako ning pagsaulog sa Santos nga Misa. Ang unang higayon niadtong Covid.

Karon ning ikaduhang higayon nga nakasaulog ko niini. Sa akong pagtan-aw sa mga pangalan nga mosaulog sa Santos nga Misa akong nakita nga mga eksorsista kasagaran ang mosaulog sa Santos nga Misa.

Kini tungod kay ang ebanghelyo nga gibasa sa Misa naghisgot man mahitungod sa yawa ug kun sa unsang paagi siya gipapahawa ni Jesus.

Sa atong pagsaulog sa Piyesta sa Senyor angayan natong hinumdoman nga bisan kun tuod bata ang bayhon ni Senyor Sto. Niño apan wala siya magpabilin nga bata. Ang iyang kagamay wala magkahulogan og kahuyangan.

Gamhanan siya, ug ang maong kagamhanan makapalisang gyud sa mga demonyo!

Sa laing bahin, sa atong pagdebosyon ni Senyor Santo Niño atong ipadayag ang atong dakong gugma pinaagi sa pagsalikway sa bisan unsa nga kaaway sa balaang bata lakip na niini, ang yawa ug ang iyang binuhatan.

Atong talikdan ang sala, ang mga patuo tuo ug mga okulto. Labaw sa tanan dili nato tugotan nga sa hinay hinay apan sa segurong paagi ang yawa moangkon kanato ngadto sa hingpit sanglit wala nato panalipdi ang atong pagka binunyagan ni ang atong pagka anak sa Dios. Angayan kitang mag-ampo, magmatngon ug manlimbasog nga magpuyo diha sa presensiya sa Dios adlaw adlaw sa atong kinabuhi. Balaang Bata panalipdi kami.

Pagpaminaw

Mahinungdanon kaayo ang pagminaw sa pulong sa Dios ug sa Dios gyud mismo. Mao nga kinahanglan gyud ang pag-ampo ingon man ang pagbasa sa Balaang Kasulatan ingon man ang pagpakighinabi sa atong Ginoo atubangan diha sa Santisimo Sakramento.

Nga sa ato pa, kinahanglan gyud kaayo ang pag-ampo. Human ka makapaminaw sa Ginoo mao usab kini ang imong sukaranan sa pagpaminaw usab sa imong isigkaingon. Sa unsa mang paagi?

1. Ang imong presensiya kun ang imong pagka-anaa diha sa kinabuhi sa imong isigkaingon labina gyud sa mga panahon sa ilang mga panginahanglan. Gitawag kini og Ministry of Presence.

2. Pagdasig sa matag usa nga ang iyang tingog bililhon ug mahinungdanon ug tungod niini  kinahanglang hatagan og igong gibug-aton.

3. Ang mga butang dili maayo nga madunggan dili pagaisipon nga hulga kondili pahigmata. Ang mga butang maayo nga madungog ang pagaisipon nga makahupay nga mensahe alang kanila nga naghago alang sa kinabag-an.

Dili kita makapaminaw kondili kita mohilom. In order to listen we have to be silent.