EDITORYAL — Upat ka adlaw nga trabaho

Sugod karong adlawa ipatuman na ang 4-day work week nga kabahin sa mga pamaagi sa gobiyerno aron makadaginot tungod sa krisis sa presyo sa petrolyo dala aning gubat didto sa Middle East nga nakapalisud sa produksyon ug transportasyon sa lana gikan didto.

Si Presidente Ferdinand Marcos Jr. mipagawas og kamandoan nga sugod karong adlawa Marso 9 ipatuman sa mga buhatan sa mga ahensiya sa gobiyerno ang upat ka adlaw nga trabaho , ang usa ka adlaw anha nalang trabahoon sa balay kung puyde.

Parte kini sa pagdaginot sa gobiyerno aron makamenus sa gastos sa petrolyo. Dili lang kini bahin sa gastos sa kwarta kondili, aron motaas-taas pa ang lahutay sa tanang buhatan sa gobiyerno unya kung pananglitan adunay emehensiya nga magkinahanglan sa paggamit sa mga sakyanan.

Hinuon dili tanang ahensiya sa gobiyerno ang kinahanglan mosunod ani, ang mga ahensiya nga may kalambigitan sa seguridad, emerhensiya, panglawas, frontliners, dili kinahanglang mosunod ani nga sistema.

Ning bag-o, ang Department of Education mipahibalo sab nga dili apil sa 4-day work week ang ilang departamento tungod kay importante ang edukasyon sa mga batang Pilipino. Si Marcos miingon nga apil sa kinahanglang mosunod ani ang mga government –owned or controlled corporations (GOCCs) , mga LGUs, constitutional bodies, state universities and colleges ug uban pang buhatan nisuporta sa ubang ahensiya sa gobiyerno.

Gawas sa pagdaginot sa petrolyo, gimandoan sab niya ang tanang ahensiya ug buhatan sa gobiyerno nga pamenusan gikan 10 ngadto sa 20 porsiyento ang ilang konsumo sa kuryente.

Sa pagkakaron, duna nay gipatumang mga subsidiya para sa mga nagkadaiyang sektor sa transportasyon para sa ilang konsumo sa petrolyo kada adlaw.

Apil sa planong ipatuman ang pagpamenus sa excise tax nga kinahanglang bayran sa mga oil companies sa ilang pagnegosyo og lana dinhi.

Hinayhinay ng namatikdan ang pagsaka sa mga presyo sa palaliton ilabi na sa bugas ug mga batakang panginahanglan. Luoy ani kadtong daan ng naglisod sa panginabuhian, busa, maayo sab ug makatabang ang tanan pinaagi sa pagpaniid ug pagsumbong niadtong mga dili makatarunganong pagpaburot sa presyo sa ilang produkto aron sila masanta dayun sa mga otoridad.