Armas sa politika batok ni VP Sara

Sa tinud-anay lang ang impeachment nga giluto karon sa Kongreso usa ka politikanhong armas batok ni Vice President Sara Duterte isip pagseguro nga dili na siya makalansar sa pagka pangulo sa nasud sa 2028 nga piniliay tungod kay sa pagkakaron siya ang labing lig-on nga presidential contender.

Ang administrasyon ug ang opposition wala pa ni bisan kinsa kanila ang lig-on nga ikaparang ni Sara sa bugnong lugaynon sa tuig 2028.

Busa klaro pa sa sidlak sa adlaw kong asa mopadung ang impeachment batok sa bise presidente.

Kining proseso karon sa Ubos Balay Balauran formality lang kini aron ingnon nga gihatagan og due process ang bise presidente.

Apan sa luyo niining tanan naluto na kong sa putahe pa andam na ihukad sa talad kan-anan ug lamyon sa mga gutom nga nagpaabot sa hingpit nga pagkapukan sa mga Duterte.

Hatagan nato og benifit of the doubt ang impeachment process nga kong basehan ang mga ebidensiya nga kasagaran recycled batok sa bise presidente dunay saktong purohan nga maabswelto siya.

Apan morag dili man diha padung ang direksiyon tungod kay dunay pressure nga papason ang mga Duterte nga gisugdan pinaagi sa pagpadala ni kanhi Presidente Rodrigo Duterte sa The Hague ug ang isunod ni ang anak niini nga si Sara.

Gibasura na niadtong 2025 sa Korte Suprema ang kaso tungod sa teknikalidad ug gibanhaw kini karong tuiga sa Kongreso.

Apan alang sa mga suporters sa mga Duterte gigamit ang issue sa confidential funds aron mapiangan si Sara sa tinguha niining magpresidente sa nasud.

Ang dakong pangutana karon: Mahatagan ba og patas nga higayon si VP Sara nga panalipdan ang iyang kaugalingon? Tungod kay ang kadaghanan sa mga sakop sa Kongreso kaalyado sa administrasyon, basin og madala kini sa "padaghanay" sa boto imbes nga tan-awon ang kamatuoran.

Ang kalig-on sa atong demokrasya nagdepende sa pagtuo nga ang hustisya walay gidapigan nga kolor sa politika.

Kon ang impeachment mapakyas sa pagpakita nga kini patas ug transparent, ang mga Pilipino ra gihapon ang mohatag sa katapusang paghukom pinaagi sa ilang tingog ug sa ilang mga boto sa umaabot piniliay.

Sa katapusan, walay bisan unsang taktika sa politika ang makabarog batok sa kabubut-on sa katawhan. Maghibaw-anay ra unya sa 2028 nga piniliay.