Sugyot sa MLC

Daghang salamat sa Movement for a Livable Cebu (MLC) nga midason sa dugay ko na’ng gisugyot nga paagi aron maminusan ang gidaghanon sa atong basura ug makadaginot ang kagamhanan sa dakong gasto paglabay niini.

Human mitumaw ang problema sa labayanan og basura ug sa kadako sa kwarta nga gikinahanglan sa dakbayan paghipos sa basura, akong gisugyot sa niagi ta nga mga lindog nga pabayron ang publiko sa matagkilo sa basura nga ilang ilabay.

Sa ingon niini mapugos ang mga tagbalay pagrecycle ug pagkontrolar sa gidaghanon sa ilang mga basura.

Mas epektibo ni kay sa ipamugos ang waste segregation bisan way igong sistema ug katakos ang syudad paghimo niini.

Sa ilang pamahayag, ang mga sakop sa MLC nga gipangulohan ni Reymarr Hijara, kanhi hepe sa CCENRO sa dakbayan sa Sugbo, uban nilang Architect Joseph Michael Espina, Joel Lee ug Jesselito Baring misugyot nga pabayron ang mga molabay og basura. Ang sugyot na subay sa “Polluter-Pays Principle” nga gilatid sa Republic Act 9003.

Pinaagi niini matabangan ang syudad sa kadako sap undo nga gikinahanglan paglabay og basura. Basi sa Department of Public Services (DPS) ang hauling ug tipping fees sa basura moabot na og P3,904 matag tonelada o P3.90 matag-kilo.

Sa maong kantidad, gibana-bana ni Mayor Nestor Archival nga mogasto ang syudad og P2 billion sulod sa usa ka tuig paglabay lang sa basura.

Ang pundo mahimo na unta nga magamit sa ubang importanteng proyekto sama sa pag-ayo sa mga gubaon nga karsada ug uban pang edipisyo nga kapahimuslan sa katawhan.

Hinaot tun-an sa syudad ang maong sugyot og paspasan ang lihok pagpangita og paagi arton masulbad ang problema sa basura.

Ang labing mahinungdanon gyud sa pagkakaron mao nga makabaton og kaugalingon nga facility ang syudad nga iyang kalabayan sa basura tungod kay siguradong mosamot ang kadako sa gasto paghakot og paglabay sa basura taliwa sa pagsulbong sa presyo sa krudo ug gasoline tungod sa nagpadayong gubat didto sa Middle East.

Nisamot ka kumplikado ang sitwasyon tungod kay gawas sa problema asa nato ilabay ang atong basura, midugang pa ang problema sa pagsulbong sa presyo mga produktong petrolyo.