EDITORYAL - Patentero sa SRP viaduct

Daghang mga motorista ang nangreklamo bahin anang mga kabataang magbahis-bahis diha sa South Road Properties viaduct tungod sa kapeligro sa lugar ug anha gyud sila magkiat-kiat.

Kaning mga bataa maglabang-labang diha sa agianan sa mga sakyanan ug pagkahuman manglayat gikan sa railings padulong sa dagat.

Gihimo nilang playground ang peligroso kaayong viaduct para sa mga tawong maglakaw-lakaw diha. Mura sila og nakig-patentero sa mga dagkong sakyanan nga mag-agian diha sa maong viaduct.

Pero dili lang kaning mga bataa ang nabutang sa peligro kondili hasta pud ang mga motoristang mag-agian sa viaduct. Kay dako ang tsansang makabangga ug makaligis sila aning mga bataa. Sila nasab maoy mapurhisyo.

Gawas pa ana, dunay mga motorista nga nangreklamo na tungod anang mga pagpamato aning mga bataa. Ning bag-o, usa ka dakong trak ang gilabay og bato sa mga bata diha sa ubos nga bahin sa viaduct.

Nabuak ang samin sa trak, maayo nalang nga wala mawad-i og kontrol ang drayber ug luwas niyang napadaplin ang trak. Pero kutob ra paghuyhoy sa abaga ang drayber kay ang mga bata naa man sa ubos nanukad sa pamato.

Kanang viaduct nanukad na sa Barangay Ermita hangtud sa Barangay Pasil ayha pa maabot sa SRP. Kang kinsa mang responsibilidad ang pagbadlong aning mga bataa?

Kinahanglan ba gyud nga mga polis? Mga sakop sa DPWH? O sa barangay? Paabuton pa ba sa lokal nga kagamhanan sa dakbayan sa Sugbu nga dunay mga dagkong karambola sa mga sakyanan diha sa viaduct tungod aning mga bataa?