Yuta ang ibayad sa utang

Dear Atty. Divine,

Ang akong iyaan nakautang og kwarta sa akong parents kay gibayad sa iyang bayranan sa hospital. Tungod ani, midesisyon ang akong iyaan nga ang iyang yuta mao nalay ibayad sa akong parents.

Unsay mga dokumento ang angay namong kuhaon gikan sa akong iyaan aron adunay proof ang akong parents nga ila nang napalit ang yuta sa akong iyaan? Daghang salamat.

Elsie

* * *

Dear Elsie,

Basi sa atong balaod, kun real property gani ang i-dispose or ibaligya kinahanglan gyud nga ang pagbaligya niini in writing ug dili lang verbal. Kini basi sa Article 1403 ( Statute of Frauds) sa atong New Civil Code.

Kay kun verbal lang gani ang kasabutan dili kini  mamahimong idangop sa korte aron ipatuman ang  kasabutan kay ang atong balaod nagmando man gyud nga kinahanglan in writing kun maglambigit og real property. Busa kun ibaligya sa imong iyaan ang  iyang yuta ngadto  sa imong ginikanan kinahanglan nga inyo siyang papirmahon og Deed of Absolute Sale ug kinahanglan sab ninyo kining ipa notarized.

Kun titulado ang property, inyo sab kuhaon ang kopya sa original title niini lakip na ang kopya sa tax declaration aron inyong ma-process ang pag-transfer niini. Thank you and God bless!

Atty. Divine

* * *

Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.