Ang kahulogan sa Edukasyon

Gikan kini sa pulong latin nga: “Educere” kun drawing out. Kini ang hinungdan kun nganong “To Draw Out” ang awit sa among Schola Dominicalis kun Sunday School dinhi sa among Parokya ni San Viocente Ferrer sa Buanoy Balamban Sugbo.

Nagtuo kita dako uyamot nga anaa sa matag bata ang kaayo nga gikan sa Dios.

Nga dunay kaayo nga makuha sa matag bata kun sila magiyahan lamang sa mga hamtong aron dili mahisalaag.

Tumong ning maong Sunday school mao man ang pagdasig aron ang matag bata madasig diha hustong pagsabot sa pagtulon-an sa atong pagtuo, magiyahan sa ilang kinabuhi sa pag-ampo.

Kay kun dili nato sila tudloan sa pagkakaron kinsa naman lang ang motudlo nila ugma?

Sa laing bahin, atong angkunon nga dili paigo ang panahon diha sa atong tagsa tagsa ka mga tunghaan panahon sa school year.

Kini tungod kay daghan man og mga kalihukan ang mga tunghaan.

Dugang pa niini ang mga kabataan atong abagan usab diha sa ilang mga panginahanglan.

Timaan kini nga ang Parokya bisan pa man sa kahagip-ot sa mga tinubdan ang makahimo gihapon sa pag-abag bisan sa mga ginagmay nga mga incentives nga ilang gikinahanglan.

Nagpasabot lamang kini nga ang Parokya anaa ug kuyog ingon man kabahin sa panaw sa matag bata ug batan-on sa Parokya.

Atong himoon ang Parokya ingon nga sentro sa mga kalihukan ug katilingbanong kalambigitan.

 Ang Parokya dili isolated nga lugar diin pari lamang ang nagpuyo kondili ang Parokya dapit diin anaa ang kalipay, pagtinabangay ug pag-inampoay.