EDITORYAL — Paglikay sa sunog

Karong nisulod na ang bulan sa Marso mabantayan na ang hinayhinay nga pagsaka sa temperatura sa klima. Sama sa gipaabot daghan na sab mga insidente sa sunog ang posibleng mahitabo ilabi na sa mga kabalayan ug bisan sa mga dagkong establisamento.

Mao nga aning buwana gyud ang pagtimaan sa Fire Prevention Month tungod kay nabantayan nga kada bulan sa Marso dunay daghang insidente sa mga sunog . Mao kini ang bug-at nga rason kun nganong aning buwana gyud kini saulogon.

Milyones ka pesos ang nangaugdaw ug dunay mga kinabuhing nakalas aning mga buwana mao nga kinahanglang triplihon sa mga tawo ang pag-amping.

Ang Bureau of Fire Protection sa Cebu City palang daan, nakatala na og 20 ka mga insidente sa sunog gikan sa Enero hangtud ning bulana ning tuiga. Maayo nalang nga walay mga nakalas.

Usa sa epektibong pamaagi aron makalikay sa sunog o walay sunog nga mahitabo sa mga panimalay ug sa kabarangayan mao ang edukasyon.

Kinahanglang nakahibalo ang matag miyembro sa pamilya kung unsa ilang responsibilidad aron dili magkasunog sa ilang panimalay. Sama sa pagtudlo sa mga bata bahin sa peligro sa pagduwa og posporo, lighters ug kandila.

Ang pagtudlo sa tanang sakop bahin sa hustong pagpawong sa mga lutoan, pag-ibot sa plug sa kuryente kung dili gamiton, paglikay og gamit og octopus sockets, ilegal nga pagkonektar sa kuryente, hustong paghipos sa mga flammable materials ug uban pa.

Labing maayo sab nga tudloan ang tanang miyembro sa basic firefighting sa sulod sa ilang balay inay nga maglumba og panagan sa pag-ulbo palang sa sunog.

Sa pikas bahin, kinahanglan nga palig-unon sa mga barangay ang kapabilidad dili lang sa ilang barangay fire volunteers kondili apil sab ilang mga konstituwente kay sila maoy naa sa dapit atol sa pagsugod sa sunog.

Ang sunog usa ka katalagman nga binuhatan sa tawo. Mahimo kining malikayan kung ang tanan mag-amping ug nakahibalo sa ilang mga responsibilidad.