Wala kasohi

Sa labing unang higayon, karon pa nahitabo nga dunay motoristang nalambigit sa disgrasya ang wala pasakai og kaso sa kapolisan bisan pa man og dunay namatay sa aksidente.

Nahitabo ni sa lungsod sa Minglanilla diin duha ka mga nagsakay og motorsiklo ang nasampak sa luyong bahin sa trak de karga nga ilang gisundan.

Nigawas man gud sa imbestigasyon sa kapolisan sa lungsod pinangulohan ni Police Lieutenant Colonel Maria Theresa Macatangay, hepe sa Minglanilla Police nga walay sala ang drayber sa trak.

Gibasi nila kini sa imbestigasyon ug mga pamahayag sa mga nakakita, pun-an pa gyud sa kuha sa CCTV camera nga diin nagpakitang ang motorsiklo maoy nibangga sa trak ug dili ang trak ang nakabangga.

Nahitabo sab kini samtang ang trak padulong moliko sa wala. Tingali wala makabantay ang drayber sa trak nga nag-signal nga moliko mao nga diretso kini og kasampak.

Sagad man gud mahitabo kaniadto, bisan og klaro kaayo nga walay sala ang drayber sa nahitabong aksidente, pasakaan gyud sa mga polis og kaso ug bahala na daw ang piskalya o ang korte maoy modisider kung angay ba silang kasohan.

Hasol kaayo ni sa mga inosenteng drayber ilabi na kung masuta nga wala gyud silay sala.

Ning bag-o, dunay mga giduso nga balaudnon sa Kongreso nga usbon ang tratamento sa mga kaso sa mga aksidente sa kadalanan tungod kay daghang tarung nga mga drayber ang nahasol ug nagkaproblema tungod ani nga sistema.

Maayo unta og tanang polis nga mag-imbestigar og mga aksidente sa kadalanan sama ka propesyonal sa gibuhat sa Minglanilla Police.