First Communion

Daghang mga bata ang gipakumpisal karong semanaha. Sila kadtong giandam aron mohimo sa ilang first communion.

Daghang mga bata nga nikumpisal. Dunay uban gikulbaan, dunay uban buot moikyas kay gikuyawan. Apan atong gipaningkamotan nga bisan pa man kon dili magkadimao usahay ang ilang ipangyawit apan mamahimong komportable ug at home sila sa sakramento.

Mamahimong halandumon unta ang ilang unang pagdawat sa atong Ginoo diha sa Sagrada Eyukaristiya.

Usa kini ka hagit alang sa mga ginikanan, katekista ingon man sa padre kura ug sa tibuok Parokya nga mas mahigugma ang kabataan sa atong Ginoo diha sa bayhon sa pan ug bino.

Kasinatian kini nga angayang palig-onon unta sa matag Parokya.

Kay kon dili nato tudloan ang atong mga kabataan karon unsa na lang kaha ang mahitabo ugma.

Ang mga kabataan ug kabatan-onan mao man ang hulagway sa atong simbahan ugma. Kinahanglang padayon kitang magkat-on.

Kinahanglang hatagan og gibug-aton ang programa sa pag-ebanghelyo.