Akong bagtak

Kining nagkatiguwang na ta (angkonon sa walay kusmod) akong nasinati nga nagkahinay na ang akong lawas.

Lakip na pud niini ang akong bagtak nga pwerteng sakita ug nagkinahanglan gyud sa hinabang sa hilot ug salompas. Kapoy ang mobarog, kapoy ang molingkod, arang arang ang paglakaw apan sakit sa gihapon.

Adunay mga higayon nga kinahanglan kong mohinay. Pasabot ba kini nga inanay nga Nawala ang paspas nga mga lakaw ug kalihukan? Nagpasabot ba kini og SLOW DOWN NA? Gumikan niini atong himoon ang pulong SLOW ingon nga usa ka Acronym sa atong pamalandong.

Silence. Diha sa atong kahilom atong masinati ang Ginoo ug makita nato ang atong kaugalingon. Lakip na niini ang mga maayo ug dili maayo nga bahin sa atong pagkakita.

Listen kun pagpaminaw sa mensahe nga iya sa Dios diha sa Balaang kasulatan, pagtulon-an sa Simbahan nga mohatag kanato og giya sa atong padulngan. Wala ang Dios sa kasaba hinunoa anaa siya diha sa kahilom.

Open sa mga posibilidad sa kinabuhi. Abli diha sa grasya sa Dios ug abli diha sa misyon nga mahimong sagubangon.

Wonder kun ang kahingangha sa mga pamaagi sa Dios. Misteryoso ang Diosnong pamaagi apan kinahanglan nga ato kining saulogon adlaw adlaw sa atong kinabuhi.

Sakit man tuod ang akong bagtak apan mahimo kining kahimanan aron sa ginagmay nga paagi makaambit ako sa kasakit sa atong Ginoo didto sa Balabag sa krus.